• Հայ
  • Рус
  • Eng
Բժշկել նաև երաժշտությամբ. «Սպեղանի» երգչախումբը համերգով հանդես եկավ բժշկականում
Բժշկել նաև երաժշտությամբ. «Սպեղանի» երգչախումբը համերգով հանդես եկավ բժշկականում
30.10.2018

ԵՊԲՀ կարմիր դահլիճն այսօր համախմբել էր մեր բուհի երաժշտասերներին, համալսարանականները «Սպեղանի» երգչախմբի համերգային ծրագիրը վայելելու հնարավորություն ունեցան:

Միջոցառմանը ներկա էր նաև ՀՀ մշակույթի նախարարի պաշտոնակատար Լիլիթ Մակունցը, մշակութային գործիչներ: Երգչախմբի հիմնադիր, գեղարվեստական ղեկավար և խմբավար, ՀՀ մշակույթի վաստակավոր գործիչ Սարինե Ավթանդիլյանը ողջունելով համերգի մասնակիցներին ներկայացրեց հագեցած համերգային ծրագիրը, որն ընդգրկում էր ինչպես հայ, այնպես էլ օտարազգի անվանի կոմպոզիտորների ստեղծագործություններ: Համերգն անմասն չմնաց նաև անդրանիկ կատարումներից, որոշ խմբերգեր այսօր հնչեցին առաջին անգամ: Քչերը գիտեն, որ երգչախմբի կազմում արդեն 22 տարի ընդգրկված է նաև ԵՊԲՀ շրջանավարտ Մարինե Օսիպովան: Ստոմատոլոգիական ֆակուլտետի շրջանավարտն այս տարի է ավարտել կլինիկական օրդինատուրան և հաջողությամբ համատեղում է երգարվեստը բժշկական գործունեության հետ: Նրա խոսքով՝ երկու ոլորտն էլ ունեն նմանություններ, հոգևոր բաղկացուցիչ, քանի որ, ինչպես հայտնի է, երաժշտությունը ևս բժշկելու ուժ ունի, և այս առումով իր երկու զբաղվածությունները լրացնում են միմյանց: Այսօր հարազատ բուհում համերգով հանդես գալը նրա մեծ ցանկությունն էր,  որը կյանքի կոչվեց, իր, Ստոմատոլոգիական ֆակուլտետի դեկան Լազար Եսայանի և Հասարակագիտական առարկաների ամբիոնի դասախոս Հայարփի Սահակյանի համատեղ նախաձեռնությամբ:

«Սպեղանի» երգչախմբի երգացանկը միավորում է տարբեր ազգերի, ուղղությունների և ժամանակաշրջանների երաժշտություն՝ միջնադարի հոգեւոր ստեղծագործություններից մինչեւ հայ և արտասահմանյան ժամանակակից կոմպոզիտորների գործերը:

Երգչախումբը կարևոր ներդրում ունի ազգային խմբերգային արվեստի զարգացման և տարածման գործում: Երաժշտական կոլեկտիվը համերգներով շրջագայել է Հայաստանում, Արցախում, Ռուսաստանում, Լիբանանում, Իտալիայիում, Գերմանիայում, Ավստրիայում, Շվեյցարիայում, Լիտվայում՝ մասնակցելով բազմաթիվ միջազգային փառատոների և արժանանալով առաջին մրցանակների:

Երգչախմբի նվաճումներից է Կոմիտասի Սուրբ պատարագի ձայնագրումը՝ քահանայի և սարկավագի երգամասերով: Հենց այս ձայնագրությունը Սարինե Ավթանդիլյանը համերգի վերջում նվիրեց ԵՊԲՀ-ին:

Նշենք, որ ԵՊԲՀ-ում դասախոսների և սովորողների կողմից կազմակերպվող մշակութային, ժամանցային, ինտելեկտուալ, մարզական միջոցառումները պարբերական են: