Ամեն տարի ապրիլի վերջին շաբաթվա ընթացքում նշվող «Իմունականխարգելման համաշխարհային շաբաթը» նպատակ ունի ընդգծել հավաքական գործողությունները, որոնք անհրաժեշտ են պատվաստումների միջոցով կանխարգելվող հիվանդություններից մարդկանց պաշտպանելու համար:
Այս տարի «The Big Catch-up» խորագրի ներքո Առողջապահության համաշխարհային կազմակերպությունը, աշխատելով բազմաթիվ միջազգային գործընկերների հետ, նպատակադրված է աջակցելու բոլոր երկրներին՝ ավելի շատ մարդկանց կանխարգելելի հիվանդություններից պաշտպանվածություն ապահովելու գործում:
«Մենք պետք է գործենք հիմա՝ ներգրավելու միլիոնավոր երեխաների, ովքեր բաց են թողել անհրաժեշտ պատվաստումները COVID-19 համաճարակի ժամանակ, և պետք է վերականգնենք իմունականխարգելման հիմնական ծածկույթը՝ այն հասցնելով առնվազն 2019թ.-ի մակարդակին, ինչպես նաև անհրաժեշտ է ամրապնդել առողջության առաջնային պահպանման օղակը՝ իմունիզացիա իրականացնելու համար»- նշված է ԱՀԿ ղեկավարության ուղերձում:
«Հերացի» վերլուծականի փոխանցմամբ՝ համաշխարհային այս շաբաթվա հիմնական և վերջնական նպատակն է, որպեսզի ավելի շատ երեխաներ, մեծահասակներ և համայնքներն ընդհանուր առմամբ պաշտպանված լինեն պատվաստանյութերով կանխարգելվող հիվանդություններից՝ թույլ տալով նրանց ապրել ավելի երջանիկ և առողջ կյանքով:
Աջակցություն ստանալով ազգային և համաշխարհային առողջապահական գործընկերների լայն շրջանակի կողմից՝ «The Big Catch-up» արշավը նպատակ ունի նաև ապահովել առաջնային առողջապահական օղակի ավելի ուժեղացված ծառայություններ՝ ապագայում հիմնական իմունիզացիա իրականացնելու նպատակով:
Իմունիզացիան համաշխարհային առողջապահության և զարգացման ամենահաջողված երևույթն է, որն ամեն տարի փրկում է միլիոնավոր կյանքեր: Պատվաստանյութերը նվազեցնում են հիվանդանալու ռիսկերը՝ աջակցելով օրգանիզմի բնական պաշտպանիչ միջոցներին:
Այժմ գոյություն ունեն այնպիսի պատվաստանյութեր, որոնք կանխում են 20-ից ավելի կյանքին սպառնացող հիվանդություններ և օգնում են բոլոր տարիքի մարդկանց ապրել ավելի երկար և ավելի առողջ կյանքով: Ներկայումս իմունիզացիան կանխում է տարեկան 3,5-5 միլիոն մահեր այնպիսի հիվանդություններից, ինչպիսիք են դիֆթերիան, փայտացումը, կապույտ հազը, գրիպը և կարմրուկը:
Իմունականխարգելումը առողջության առաջնային պահպանման հիմնական բաղադրիչն է և մարդու անվիճելի իրավունքը: Սա նաև առողջապահական լավագույն ներդրումներից է, որը կարելի է գնել: Պատվաստանյութերը կարևոր նշանակություն ունեն վարակիչ հիվանդությունների բռնկումների կանխարգելման և վերահսկման համար: Դրանք համաշխարհային առողջապահական անվտանգության հիմքն են և կենսական գործիք են լինելու հակամանրէային դիմադրության դեմ հետագա պայքարում:
Չնայած ահռելի առաջընթացին և վերջին տարիներին պատվաստումների ծածկույթի ընդլայնմանը՝ 2020թ.-ից պատվաստումների թիվը սկսել է նվազել:
Այսպես, COVID-19 համաճարակի պատճառով իմունիզացիայի մակարդակները էական նվազել են ավելի քան 100 երկրրում, ինչը հանգեցրել է կարմրուկի, դիֆթերիայի, պոլիոմելիտի և դեղին տենդի բռնկման աճին: Համաճարակը և վերջին երկու տարվա դրանից բխող հետևանքները խաթարել են առողջապահական համակարգերը, որի արդյունքում 2021թ. 25 միլիոն երեխա բաց է թողել անհրաժեշտ պատվաստումները, ինչը 6 միլիոնով ավելի է, քան 2019թ.-ին և ամենաբարձր ցուցանիշն է 2009թ.-ից ի վեր։
Չնայած բազմաթիվ հակապատվաստումային արշավների՝ պատվաստումը հանրային առողջության պատմության մեջ ամենահաջող միջամտություններից մեկն է համարվում: Դրա վառ ապացույցը բնական ծաղիկ հիվանդության վերացումն է, որը 3000 տարուց ավելի համարվել է մարդկության պատմության ամենամահաբեր հիվանդություններից մեկը: