«Բուժական գործ» մասնագիտության կրթական ծրագիր

«Բուժական գործ» մասնագիտության կրթական ծրագրով բազային կրթությունն իրականացվում է 6-ամյա անընդհատ և ինտեգրացված ծրագ­րով: Սահմանված 12 կիսամ­յակներից յուրաքանչյուրի ուսումնական ծան­րա­բեռնվածությունը 30 ECTS կրեդիտ է: Տարեկան ծանրաբեռնվածությունը 60 ECTS կրեդիտ է, 1 կրեդիտը համարժեք է 30 ակադեմիական ժամի: Ուսումնառության ըն­թաց­քում ուսանողներն ուսումնա­սի­րում են ինչպես տեսական, այնպես էլ մաս­նա­գի­տա­կան և հարակից կլինիկական առարկաներ: Ծրագրի ավարտին շրջա­նավարտը ստանում է «Բուժական գործ» մասնագիտությամբ բժշկի որակավորում:

Տեսական դասընթացների ուսուցման գործընթացն իրականացվում է համալսարա­նական մասնաշենքերում (կենսաքիմիական, վարչական, լաբորատոր, անատո­միա­կան), կլինիկական դասընթացների ուսուցման գործընթացը՝ համալսարանի սի­մուլյացիոն կենտրոնում, համալսարանական հիվանդանոցային համալիրներում, պոլիկլինիկաներում, նշված համալիրներին կից կլինիկական ախտորոշիչ, ախտաբանական լաբորատորիա­ներում և հանրապետության բուժկանխարգելիչ այլ հաստատություններում տեղա­կայված համալսարանական կլինիկական բազաներում: Ուսուցման գործընթացն իրականացնում է ամբիոնների պրոֆեսորադասախոսական անձնակազմը: Կլինի­կական ամբիոններում դասավանդող դասախոսները պրակտիկ բժիշկներ են:

2023-24 ուստարվանից առանցքային փոփոխություններ են կատարվել կրթական ծրագրի ուսումնական պլանում: Մասնավորապես, ներդրվել է դասավանդման մոդուլային ձևաչափը:

Դասավանդվող դասընթացների ցանկն ըստ կուրսերի

«Բուժական գործ» մասնագիտության կրթական ծրագիրը և դրա կրթական միավորները կազմված են ՀՀ որակավորումների ազգային շրջանակի (ՈԱՇ-ի) և ՀՀ «Բժշկություն» ոլորտային որակավորումների շրջանակի (ՈՈՇ-ի) պահանջներին համապատասխան՝ հաշվի առնելով միջառարկայական հորիզոնական և ուղղահայաց ինտեգրացիայի սկզբունքը, ինչպես նաև կրթական ծրագրի ընդհանուր վերջնարդյունքները:

Բժշկի մասնագիտական գործունեության օբյեկտն առողջ կամ հիվանդ մարդն է:

«Բուժական գործ» մասնագիտությամբ կրթական ծրագիրն ավարտելուց հետո շրջանավարտը պետք է պատրաստ լինի իրականացնելու մասնագիտական հետևյալ գործառույթները՝

1. բուժկանխարգելիչ,
2. ախտորոշիչ,
3. բուժական,
4. վերականգնողական,
5. գիտահետազոտական,
6. կրթադաստիարակչական,
7. կազմակերպչական, կառավարման:

Բուժկանխարգելիչ, ախտորոշիչ և բուժական գործառույթներն ինքնուրույն իրականացնելու համար շրջանավարտը պետք է անցնի առնվազն մեկ տարվա հետդիպլոմային ուսուցում:

 «Բուժական գործ» մասնագիտությամբ կրթական ծրագրի ընդհանուր վերջնարդյունքներն են՝

1. Ցուցաբերել բժշկության ասպարեզում մասնագիտական տեսական և գործնական խոր գիտելիքներ և քննադատական ըմբռնում:
2. Մասնակցել առողջապահական հաստատությունների կառավարմանը:
3. Կատարել բուժառուի առողջական վիճակի վերաբերյալ տեղեկատվության հավաքում, փաստաթղթավորում և վերլու­ծություն:
4. Տիրապետել արդի կլինիկական և հարկլինիկական հետազոտությունների կիրառման, բուժման և կանխարգելման միջոցառումների նշանակման ալգո­րիթ­մին:
5. Իրականացնել նախա­հի­վան­դա­­նո­ցային և հիվանդանոցային փուլերում ախտորոշում, շտապ բուժօգնություն և ախտաբանական վիճակի հնարավոր զարգացումների կանխատեսում:
6. Կատարել բուժառուի վիճակի նախնական ախտորոշում և անհրաժեշտության դեպքում ուղեգրում նեղ մասնագետի մոտ:
7. Կատարել բնակչության առողջական վիճակի մասին տեղեկատվության հավաքում, վերլուծում, առողջապահական ծրագրերի նախագծում, իրականացում, գնահատում և հնարավոր զարգացումների կանխատեսում:
8. Իրականացնել առողջության վերաբերյալ բուժառուների, նրանց ընտանիքի անդամների, հանրության ուսուցում և մասնագիտական ուսումնական հաստատություններում դասավանդում:
9. Տրամադրել պետական և ոչ պետական հաստատություններին ու կազմակերպություններին մասնագիտական և փորձագիտական խորհրդատվություն
10. Վերլուծել և կիրառել ուսումնական, գիտական, նոր­մա­տիվ իրավական, տեղեկատվական և այլ գրականություն (այդ թվում՝ օտար լեզվով)՝ մասնագիտական գործունեության, ինքնազարգացման և նոր գիտելիքի ստեղծման նպատակով
11. Անցկացնել կենսաբժշկական և առողջապահական հիմնախնդիրների շուրջ գիտահետազոտական աշխատանքներ
12. Ցուցաբերել արդյունավետ հաղորդակցման, թիմային աշխատանքի, ստանդարտ և ոչ ստանդարտ իրավիճակներում որոշումներ կայացնելու և թիմակիցների համար պատասխանատվություն ստանձնելու հմտություններ, էթիկայի նորմերին համապատասխան գործունեություն և պատշաճ վարվելակերպ

«Բուժական գործ» մասնագիտության կրթական ծրագրով նախատեսված բոլոր դասըն­թացներն ուսումնառած, բոլոր քննություններն ու ստուգարքները հաջողությամբ հանձնած շրջանավարտները  դեկանի կարգադրութ­յամբ և ռեկտորի հաստատմամբ թույլա­տր­վում են ամփոփիչ ատեստա­վոր­ման: Վեր­ջինս  հնարավորություն է տալիս բացահայտելու ապագա բժշկի ինչպես տեսական և գործնական պատրաստվածությունը կրթական ծրագրով սահմանված մասնագիտական խնդիրների բնագավառում, այնպես էլ շարունակելու կրթությունը կլինիկական օրդինատուրայում և ասպիրանտուրայում (տեսական բժշկություն):

«Բուժական գործ» մասնագիտությամբ ինտեգրացված կրթական ծրագիրն իրականացվում է ընդհանուր բժշկության ֆակուլտետի կողմից՝ դեկանի և կրթական ծրագրի ղեկավարի հսկողությամբ: