Հիգիենայի և էկոլոգիայի ամբիոն

Ամբիոնը հիմնադրվել է 1926թ.-ին պրոֆ. Խ.Դ. Արխիպյանցի (1926-1932թթ.) կողմից: 1932-1950թթ. ամբիոնը ղեկավարել է պրոֆ. Ն.Բ. Հակոբյանը, այնուհետև 1950-1973թթ. պրոֆ. Լ.Ա. Հարությունյանը և 1973-2005թթ. պրոֆ. Տ.Ա. Ասմանգուլյանը: 2005թ.-ից առ այսօր ամբիոնը ղեկավարում է պրոֆ. Լարիսա Ռաֆիկի Ավետիսյանը: Ամբիոնն իր գործունեության ընթացքում ուսումնական աշխատանքներին զուգընթաց զգալի աշխատանք է իրականացրել հանրապետությունում հիգիենիկ գիտության զարգացման, ինչպես նաև մանկավարժական և գիտահետազոտական կադրերի պատրաստման գործում:

Ամբիոնը համալսարանի բոլոր ֆակուլտետների ուսանողներին դասավանդում է <<Հիգիենա և էկոլոգիա>> առարկան: Ծրագրով նախատեսված թեմատիկ նյութն ուսանողներին մատուցվում է դասախոսությունների, գործնական պարապմունքների և ուսանողների ինքնուրույն աշխատանքի ձևով: 2015թ-ից ընդհանուր բժշկության, իսկ 2021թ.-ից ստոմատոլոգիական և դեղագիտական ֆակուլտետների ուսանողների շրջանում կիրառվում է գիտելիքների գնահատման բազմաբաղադրիչ համակարգը: Ուսանողների ինքնուրույն աշխատանքները կազմակերպվում են ռեֆերատների, բանավեճերի և գործնական պարապմունքների ընթացքում կիրառվող հանձնարարականների կատարման միջոցով:

Հիգիենա և էկոլոգիա առարկան դասավանդելու նպատակով ամբիոնի կողմից հրատարակված են 3՝ հայերեն, ռուսերեն և անգլերեն լեզուներով ուսումնամեթոդական ձեռնարկներ, որոնք ընդգրկում են դասավանդվող բոլոր թեմաները։ Ներկայումս ամբիոնում իրականացվում են նոր դասագրքի կազմման աշխատանքներ:

Ամբիոնում դասավանդվում է նաև <<Շրջակա միջավայրի առողջություն>> առարկան հետդիպլոմային մի շարք մասնագիտություններով կլինիկական օրդինատորների համար:

Հետդիպլոմային ուսուցումն ամբիոնում ներկայացված է օրդինատուրայով` Հիգիենա որակավորմամբ (1 տարի), Հանրային առողջության ֆակուլտետում մագիստրարուրայով՝ Հիգիենա որակավորմամբ (1 տարի) և ասպիրանտուրայով` 3 տարի:

Հգիենայի և էկոլոգիայի ամբիոնում կատարվել են գիտահետազոտական աշխատանքներ հետևյալ թեմաներով`

• Սննդամթերքների քիմիական կազմի, նրանց մեջ թունավոր նյութերի առկայության որոշման, սննդային թունավորումների կանխարգելման հարցերի ուաումնասիրություն
• Հանրապետության ջրամատակարարման և ջրային ռեսուրսների պահպանման, շրջակա միջավայրում վնասակար նյութերի նորմավորման հարցերի ուսումնասիրություն
• Ծանր մետաղների ազդեցությունն ազգաբնակչության տարբեր տարիքային խմբերի առողջության վրա
• Ազգաբնակչության առողջական վիճակի վրա Հայաստանում ճառագայթային ֆոնի ազդեցության ուսումնասիրություն
• Հանրակրթական և ինտենսիվ ուսուցման դպրոցներում, ինչպես նաև բուհերում սովորողների ապրելակերպի, փաստացի սննդի, ֆիզիկական զարգացման և առողջական վիճակի ուսումնասիրություն
• Արարատյան դաշտի եղանակակլիմայական պայմանների հիգիենիկ առանձնահատկությունների ուսումնասիրություն, ինչպես նաև մեթեոպատիկ ռեակցիաների գնահատում սիրտ-անոթային համակարգի հիվանդությունների օրինակով
• Դպրոցականների և ուսանողների առողջական վիճակի, հոգեսոցիալական կարգավիճակի և ուսումնական ռեժիմի միջև գործող պատճառահետևանքային կապերի ուսումնասիրություն
• Բուժհաստատությունների կանաչապատման հիգիենիկ հարցերի ուսումնասիրություն
  • ՀՀ տարածքում միջավայրային բնական գործոնների բժշկաէկոլոգիական հիմնահարցերի ուսումնասիրություն
• ՀՀ տարածքում ուռուցքային հիվանդությունների տարածվածության ուսումնասիրություն
• Երևան քաղաքի կանաչապատմնան առողջապահական հիմնախնդիրների ուսումնասիրություն
• ՀՀ Քրեակատարողական համակարգի հատուկ քանակակազմի առողջական վիճակի ուսումնասիրում

Այժմ կատարվում են աշխատանքներ ՀՀ-ում աուտիստիկ սպեկտրի հիվանդությունների տարածվածության և միջավայրային որոշ գործոնների վերոնշյալ հիվանդությունների ձևավորման վրա ունեցած ազդեցության հիգիենիկ գնահատման, ինչպես նաև գյուղական բնակչության առողջության վրա մասնագիտական վնասակարությունների, մասնավորապես թունաքիմիկատների ազդեցության ուսումնասիրության ուղղությամբ:

Ամբիոնի աշխատակիցների կողմից գիտական հետազոտությունների արդյունքները հրատարակվել են տեղական և արտասահմանյան գիտական տարբեր ամսագրերում։

Ամբիոնը 2017-2022 թթ «Էրասմուս +» բիլատերալ համագործակցային ծրագիր է իրականացրել Կոպենհագենի համալսարանի Սննդաբանության, Սպորտի և Ֆիզիկական ակտիվության ամբիոնի հետ: Ծրագրի շրջանակում ամբիոնի 7 դասախոս և համալասարանի 3 կլինօրդինատոր վերապատրաստվել են Կոպենհագենի համալսարանում, իսկ ԿՀ 3 պրոֆեսոր հանդես են եկել դասախոսությունների շարքերով ԵՊԲՀ ուսանողների և պրոֆեսորադասախոսական անձնակազմի համար և 2 սննդաբան մագիստրոսներ ամբիոնում անցել են իրենց 6 շաբաթյա պրակտիկան:  Ծրագրի արդյունքում արդիականացվել է դասավանդվող նյութը, փոփոխվել է կլինօրդինատորների դասընթացների սննդաբանության բաղադրիչը: