Սրտաբանության ամբիոն

ԵՊԲՀ ընդհանուր բժշկության ֆակուլտետի սրտաբանության ամբիոնը համարվում է առաջատար կենտրոն սրտաբանության ոլորտում ուսումնական ծրագրերի իրականացման գործընթացում ինչպես նախադիպլոմային, այնպես էլ հետդիպլոմային ուսուցման նպատակով:

Ամբիոնը հիմնվել է 2011թվականին, Ներքին հիվանդությունների N1 ամբիոնի աշխատակիցների ընդգրկմամբ: Ամբիոնի վարիչն է պրոֆ. Հ.Ս.Սիսակյանը (2008 թ.-ից Ներքին հիվանդությունների N1 ամբիոնի վարիչ, իսկ 2011թ.-ից Սրտաբանության ամբիոնի վարիչ), ԱՄՆ-ի սրտաբանների միության ընտրված անդամ, միջազգային մի շարք հեղինակավոր ամսագրերի խմբագրությունների անդամ և գրախոս, Հայաստանի Սրտաբանական Ասոցիացիայի նախագահ (2019 – 2021թթ.):

Ամբիոնը կատարում է ծավալուն ուսումնամեթոդական, գիտահետոզատական, կլինիկական աշխատանքներ:

Ամբիոնը դասավանդում է Համալսարանի 4-րդ և 6-րդ կուրսերի սրտաբանության ծրագրերը, ինչպես նաև սրտաբանություն  ռեզիդենտուրայի շրջանում, անց է կացնում  բժիշկների վերապատրաստում և հետդիպլոմային ենթամասնագիտական ծրագրեր: Ամբիոնում անցել են իրենց ռեզիդենտուրան և վերապատրաստումը աշխարհի 23 երկրներից բժիշկներ:

Ամբիոնի կլինիկան հագեցված է ժամանակակից սիրտանոթային հիվանդությունների ախտորոշման և բուժման հնարավորություններով, ներառյալ ժամանակակից սիրտ-անոթային ախտորոշման մեթոդները, ինտերվենցիոն սրտաբանությունը, սրտային անբավարարության ժամանակակից բուժման մոտեցումները:

Ամբիոնը հայտնի է Հայաստանում և Հայաստանից դուրս իր ժամանակակից սիրտ-անոթային մեթոդների ներդրմամբ, միջազգային համագործակցությամբ, ուսուցմամբ մարզերում, կանխարգելիչ սրտաբանական միջոցառումների անցկացումով, նոր կրթական ծրագրերի իրականացումով:

Ամբիոնի հիմնական գիտահետոզատական ուղղություններն են՝

1) Սրտի ռեմոդելավորման պաթոգենեզի առանձնահատկությունների ուսումնասիրումը սրտային անբավարարության զարգացման գործընթացում

2) սրտային անբավարարության բուժման նոր մոտեցումներ և հոսպիտալիզացիաներ և մահածության նվազման ուղղված միջոցառումներ

3) սրտամկանի սուր ինֆարկտի դեպքում պրոգնոստիկ նոր մարկերների ուսումնասիրում

4) կլինիկական բազմակենտրոն հետազոտություններին մասնակցություն

Ամբիոնի աշխատակակիցների կողմից հրապարակվել են մի շարք ուսումնական ձեռնարկներ:

Ամբիոնը մասնակցել է Եվրոպայի սրտաբանների միության կողմից մշակվող ուղեցույցերին (Պերիկարդի հիվանդություններ  2015, Սուր և խրոնիկ սրտային անբավարարություն  2016, Միոկարդի ռևասկուլյարիզացիա  2018, Նախասրտերի շողացման բուժում 2020):

Ամբիոնի աշխատությունները լայնորեն լուսաբանված են Միջազգային ինդեքսավորված ամսագրերում:

Ընդհանուր և ինվազիվ սրտաբանության կլինիկայում իրականացվում է սիրտ-անոթային տարբեր պաթոլոգիաների բուժում, այդ թվում՝ սրտի իշեմիկ հիվանդություն, սուր և խրոնիկ սրտային անբավարարություն, կարդիոմիոպաթիաներ, առիթմիաներ, սրտի փականային հիվանդություններ, ծայրամասային անոթային հիվանդություն: Կլինիկայում լայնորեն կիրառվում են ինվազիվ և ոչ ինվազիվ բուժման մոտեցումներ: Ընդհանուր և ինվազիվ սրտաբանության կլինիկան համարվում է Հայաստանում սրտի մագնիսառեզոնանսային շերտագրություն (ՄՌՇ) և ժամանակակից էխոսրտագրության մեթոդների կիրառման առաջատարը: Կլինիկայում տարեկան կատարվում է ավելի քան 1000 կորոնար և ծայրամասային զարկերակների անգիոպլաստիկ միջամտություններ։ Սրտամկանի սուր ինֆարկտից մահացության ցուցանիշը կազմում է մոտ 5,4%, ինչը համեմատելի է եվրոպական առաջատար սրտաբանական հաստատությունների ցուցանիշների հետ: Էխոսրտագրության հետազոտությունների տարեկան ծավալը ներառում է ավելի քան 10 000՝ տրանսթորակալ, 300՝ տրանսէզոֆագեալ և 300 4D էխոկարդիոգրաֆիկ հետազոտություններ: