2024 թվականը` ծնողակրթության տարի

Ինչպես գիտեք, ԵՊԲՀ առողջապահության ծրագրերի ազգային գիտահետազոտական կենտրոնը («Հերացի» վերլուծական) ԵՊԲՀ գիտական խորհրդի կողմից ընդունված  և հաստատված աշխատանքային կարգով 2022 թ.-ի փետրվարից սկսել է աշխատանքային գործունեությունը:

Այդ ժամանակահատվածում կենտրոնի կողմից կատարվել են ընթացիկ, արդի և հանրային հետաքրքրություն ներկայացնող առողջապահական հիմնահարցերի մշտադիտարկում, վերլուծություն, կանխատեսումների իրականացում, ոլորտում առկա խնդիրների ազդեցության գնահատում:

Բժշկագիտության տարբեր ոլորտներում ժամանակակից մոտեցումների վերաբերյալ իրազեկվածության մակարդակը բարձրացնելու նպատակով կազմակերպվել և իրականացվել են համալսարանական հիվանդանոցային համալիրների միջին և ավագ բուժանձնակազմի համար նախատեսված կրեդիտավորված վերապատրաստման դասընթացներ և կոնֆերանսներ, որոնց արդյունքում շուրջ 1000 մասնակից ձեռք են բերել մասնագիտական, ոլորտի համար անհրաժեշտ նոր գիտելիքներ և հմտություններ:

Տեղեկատվական-վերլուծական աշխատանքներ են իրականացվել տարածաջրջանում և աշխարհում գլոբալ հիմնախնդիրների վերաբերյալ, մասնավորապես՝ կլիմայի փոփոխությանը, օդի աղտոտվածությանը, տարածաշրջանային առողջապահական համակարգերին սպառնացող վտանգներին, Covid-19 համավարակին և դրա հետևանքով առաջացած խնդիրներին նվիրված վերլուծություններ, որի արդյունքում շուրջ 130 վերլուծական աշխատանքներ են հրապարակվել կենտրոնի ֆեյսբուքյան էջում, որոնց մեջ ներառված է ժողովրդագրական հարցերին նվիրված հրապարակումների շարքը՝ այդ բնագավառում Հայաստանում առկա խնդիրների բարձրացման և հանրության հետ համագործակցելու համար:

Իրականացվել են նաև ծրագրային ուսումնասիրություններ.

1. Հայաստանում և եվրոպական երկրներում մանկաբուժության ոլորտի համապարփակ վերլուծություն:
2. 21-րդ դարի բժշկական կրթության միջազգային փորձի ուսումանասիրություն:
3. ԵՄ և ԱՊՀ որոշ երկրների բժշկական կրթության առանձնահատկությունների, բժշկական մասնագիտությունների և նեղ մասնագիտացումների վերաբերյալ համապարփակ վերլուծություն: 

2024 թվականին վերլուծականը նախատեսում է իրականացնել հետևյալ միջոցառումները` հայտարարելով ծնողակրթության տարվա մեկնարկի մասին:

Կանցկացվեն գիտաժողովներ, դասընթացներ՝ միտված երեխաների առողջության պահպանմանը, ճիշտ կրթական, հոգեբանական, ֆիզիկական մեխանիզմների ձևավորմանը:

Այսպիսով, 2024 թվականի սկզբից նախատեսում ենք անցկացնել բազմաթիվ կոնֆերանսներ, դասընթացներ, միջոցառումներ, բանավեճեր «ծնողական ժողովի»  ձևաչափով, նվիրված հետևյալ հիմնախնդիրներին.

• Փետրվար – «Ջրծաղիկ. Կլինիկական, համաճարակաբանական առանձնահատկությունները տարբեր տարիքային և սոցիալական խմբերում: Կանխարգելման արդի մոտեցումները»
• Մարտ – «Թվային հիգիենա, գաջեթներ, կախվածություն. հոգեբանական և ախտաբանական ազդեցությունը մանկական և դեռահասային տարիքում, աուտիզմ»
• Ապրիլ – «Հղիության պլանավորում, արհեստական բեղմնավորում, TORCH համալիր, պատվաստումներ մինչ հղիություն և հղիության ընթացքում»
• Մայիս – «Պատվաստումներ, պատվաստանյութերի հիմնական տեսակները, ռիսկ/օգուտ հարաբերակցությունը, հակացուցումներ, հնարավոր անբարեհաջող ելքեր, դրանց վարումը»
• Հունիս – «Երեխայի սննդակարգը ծնվելուց հետո մինչ պատանեկություն: Արագ սնունդ, ճարպակալում, շաքարային դիաբետ, աղիքային վարակներ»
• Սեպտեմբեր – «Երեխայի հոգեբանական, ֆիզիկական և մտավոր զարգացում, կրթություն: Կախվածություններ. կանխարգելում, դրանց հոգեբանական, սոցիալական և ախտաբանական հետևանքները»
• Հոկտեմբեր – «Բուժօգնության կազմակերպում հղիության պլանավորումից մինչև 18 տարեկան. տարբեր երկրների փորձ, դեմոգրաֆիկ ցուցանիշներ, հասանելիություն և կարիք»
• Նոյեմբեր – «Մանկական տարիքի սքրինինգ հետազոտություններ, դրանց նշանակությունը, արդյունքները, միջազգային և տեղական փորձը»
• Դեկտեմբեր – «Մանկական տրավմատիզմ, համաճարակաբանություն, վարում, կանխարգելում, առաջին բուժօգնություն»

Շարունակական նախատեսում ենք վերլուծել և հանրությանը ներկայացնել տեղական և միջազգային արդի հիմնախնդիրներին նվիրված տեղեկատվություն:

Ակնկալում ենք ձեր ակտիվ մասնակցությունն ու առաջարկները: