ԵՊԲՀ ուսանողական խորհրդարանի նախաձեռնությամբ բժշկական բուհում անցկացվեց քննարկում կորոնավիրուսային համավարակի դեմ պատվաստանյութերի թեմայով։
Դասախոսությամբ հանդես գալով՝ բժիշկ-կլինիցիստ, հանրային առողջապահության, համաճարակաբանության մագիստրոս, Բոստոնի Թաֆթս համալսարանի կլինիկական դասախոս Անուշ Սահակյանը ներկայացրեց աշխարհում պատվաստանյութերի կիրառման համառոտ պատմությունը:
Մասնագետն ընդգծեց, որ հենց պատվաստանյութի և համատեղ ջանքերի շնորհիվ 1980 թվականին արդեն «Ծաղիկ» հիվանդությունը վերացավ։
Անդրադառնալով այս ոլորտում ապատեղեկատվությանը՝ Անուշ Սահակյանն ընդգծեց, որ պետք է ապավինել գիտական ուսումնասիրություններին։
«Պետք է հասկանալ, որ չկա պատվաստանյութ, որը 100%-ով կպաշտպանի վիրուսից։ Սակայն, միևնույն ժամանակ, չկա երաշխիք, որ կրկնավարակի դեպքում մարդն ավելի ծանր չի տանի հիվանդությունը քան պատվաստված լինելու դեպքում», – վստահեցնում է մասնագետը։
Վիճակագրությունը, ըստ Անուշ Սահակյանի, ցույց է տվել, որ պատվաստվածներն ավելի թեթև են տանում հիվանդությունը, իսկ մահացության թվերը նրանց շրջանում ցածր են։
Մանրամասնելով գոյություն ունեցող պատվաստանյութերի բաղադրությունը՝ Անուշ Սահակյանը մատնանշեց դրանցից յուրաքանչյուրի կողմնակի ռիսկերն ու հնարավոր վտանգները։
