ԵՊԲՀ Վիրաբուժական ստոմատոլոգիայի և դիմածնոտային վիրաբուժության ամբիոնի պրոֆեսոր, բժշկական գիտությունների դոկտոր, «Ստոմատոլոգիա 21-րդ դար» ասոցիացիայի նախագահ, միջազգային տարբեր ասոցիացիաների և ակադեմիաների անդամ Կարեն Լալայանի մասնագիտական դեղատոմսն է՝ լավ բժիշկ դառնալու միակ նախապայմանը մասնագիտությունը սիրելն է ու աշխատանքին նվիրվելը:
Խոստովանում է, որ բժիշկ դառնալու որոշումը կայացրել է 10 տարեկանում:
«Մայրս ատամնաբույժ էր, նա ինձ պարբերաբար տանում էր ատամնաբուժական կաբինետ: Այլ ուղղությամբ չէի էլ մտածում: Բաքվում բժշկական բուհն ավարտելուց հետո մեկնել եմ Ղազախստանի Կարագանդա քաղաք: Սկսեցի աշխատել որպես ընդհանուր վիրաբույժ: Մնացի 8 տարի: Այնուհետև վերապատրաստման ծրագրեր եմ անցել Սանկտ Պետերբուրգում, Օդեսայում, Ալմաթիում, Նովոսիբիրսկում: Մոսկվայում հեռակա սովորել եմ ասպիրանտուրա, Մոսկվայի ատամնաբուժական գիտահետազոտական ինստիտուտում աշխատել երկու տարի»,-նշում է անվանի բժիշկ Կարեն Լալայանը:
Հայաստանում բժիշկների վերապատրաստման և կատարելագործման ինստիտուտի բացումից հետո, ինստիտուտի հիմնադիր ղեկավար Սուրեն Ավդալբեկյանի առաջարկով, Կարեն Լալայանը սկսում է աշխատել այնտեղ:
«Ստոմատոլոգիական ամբիոնում աշխատելու համար անհրաժեշտ էր ռուսերենի իմացությամբ մասնագետներ, մարդիկ գալիս էին ՌԴ-ից, սիրում էին Հայաստանը, գալիս էին այստեղ մասնակցելու վերապատրաստման դասընթացների: Եկա Հայաստան: 1974 թվականին Նոր Նորքում բացվեց Ատամնաբուժական հանրապետական կենտրոն, այնտեղ սկսեցի աշխատել որպես վիրաբույժ, և ասիստենտ վերապատրաստման ինստիտուտի ամբիոնում, այդտեղից էլ սկսեցի զբաղվել գիտությամբ»,-անցած ճանապարհի մասին է պատմում պրոֆեսորը, որը ուրախությամբ է խոսում արյունահոսությունը դադարեցնող իր ստեղծած դեղամիջոցի մասին, որը հետագայում լայն կիրառություն է ստացել ոչ միայն Հայաստանում, այլև դրա սահմաններից դուրս:
«Դրա հիման վրա Մոսկվայում պաշտպանեցի թեկնածուական ատենախոսություն, յոթ տարի անց Հայաստանում պաշտպանեցի դոկտորական ատենախոսությունը: Արդեն 40 տարի աշխատում եմ «Վան» ատամնաբուժական կենտրոնում, շատ սիրված կոլեկտիվում»,-նշում է ԵՊԲՀ դասախոսը:
Ունենալով տարեկան մոտ 280 ստոմատոլոգ պատրաստելու փորձ` պրոֆեսորը ոգևորությամբ է խոսում իր ուսանողների մասին: Երիտասարդ սերունդն, ըստ նրա, շատ լավն է, խելացի, ընդունակ, առանց որևէ բարդույթի:
Կարեն Լալայանի խոսքով՝ տեխնոլոգիական հնարավորությունները օգտագործելով՝ ապագա բժիշկները կարողանում են յուրացնել ոլորտի նորարարությունները:
«Իմ խորհուրդն ուսանողներին այն է, որ լավ մարդ դառնան, հիվանդին վերաբերվեն որպես հարազատի»,-նշում է Կարեն Լալայանն ու հավելում, որ մեր երկիրն ունի ուժեղ, պրոֆեսիոնալ մասնագետներ:
Նրանց գործունեությունը նպաստել է ստոմատոլոգիական տուրիզմի զարգացմանը:
Ոլորտի լաբորատորիաների տեխնիկական հագեցվածությունն ու ոլորտում լավ մասնագետների ներգրավվածությունը, պրոֆեսոր Լալայանի գնահատմամբ, մեծացրել են բուժման արդյունավետությունը:
Անկեղծանում է՝ եթե կրկին մասնագիտություն ընտրելու առջև կանգնած լիներ, կրկին կընտրեր ստոմատոլոգիան:
«Իմ քաղաքականությունը ստոմատոլոգիան է»,-եզրափակում է համալսարանականը:
