Յուրաքանչյուր տարի մայիսի 5-ին նշվում է ձեռքերի հիգիենայի համաշխարհային օրը: Ձեռքերի հիգիենայի համաշխարհային օրվա ամենամյա անցկացման մասին որոշումն ընդունվել է 2008 թվականին ՄԱԿ-ի գլխավոր ասամբլեայի կողմից` ՅՈՒՆԻՍԵՖ-ի մանկական հիմնադրամի և Առողջապահության համաշխարհային կազմակերպության (ԱՀԿ) հետ համատեղ: ԱՀԿ-ի այս տարվա կարգախոսն է՝ «Միավորվենք հանուն անվտանգության, մշակենք մեր ձեռքերը»:
Բուժաշխատողների ձեռքերը գործնականում համարվում են բժշկական միջամտություններով պայմանավորված վարակների փոխանցման հիմնական գործոնը: Ձեռքերի` ժամանակին և ճիշտ հիգիենիկ մշակումը բուժանձնակազմի և հիվանդների անվտանգության գրավականն է:
Բժշկական կազմակերպություններում ձեռքերի հիգիենան անհրաժեշտ է իրականացնել՝ համաձայն ԱՀԿ-ի 5 մոտեցումների՝ պացիենտին մոտենալուց առաջ, ասեպտիկ միջամտություններից առաջ,կենսահեղուկներին առնչվելուց հետո, պացիենտից հեռանալուց հետո, պացիենտի շրջակա միջավայրում լինելուց հետո:
Ձեռքերի ապաբաղարկման խնդրահարույց անատոմիական հատվածներ են մատների ծայրերը, միջմատնային տարածությունները և առաջին` բութ մատների շրջանը: Այս հատվածներում կուտակվում է մանրէների մեծ մասը:
Կլինիկական աշխատանքների կազմակերպման վարչության հիգիենիկ և հակահամաճարակային բաժինը և Համաճարակաբանության ամբիոնը կարևորում են ձեռքերի հիգիենայի կանոնների պահպանման վերաբերյալ ուսուցումը բուժաշխատողների և ուսանողների շրջանում՝ ևս մեկ անգամ իրազեկելով անձնական հիգիենայի պահպանման, ձեռքերը լվանալու կարևորության մասին: