Բժշկական գենետիկայի և առողջության առաջնային պահպանման կենտրոնի նախաձեռնությամբ մեկնարկեց «Կլինիկական գենետիկա և մոլեկուլային ախտորոշում» թեմայով գիտական և գործնական համաժողովը։
Երևանի Մխիթար Հերացու անվան պետական բժշկական համալսարանի ռեկտոր Արմեն Մուրադյանը ողջունեց արտերկրից ժամանած մասնագետներին՝ մաղթելով արդյունավետ աշխատանք։
«Բժշկության անձնավորումն այսօր բժշկության ապագան է։ Այս նախաձեռնությունը պատկանում է մարդկանց այն խմբին, որն իր վրա պատասխանատվություն է վերցրել խոսելու բժշկության ապագայի մասին։ Այս հիմքի վրա կզարգանան ժամանակակից բժշկագիտության և տեխնոլոգիայի «ծիլերը»։ Բժշկական համալսարանի համար շատ կարևոր է, որպեսզի բժշկագիտությունը լինի բացառապես ապացուցողական և ուղղված լինի դեպի նորարարական տեխնոլոգիաները», – ընդգծեց ռեկտորը։
Բուհի ղեկավարը հատուկ շնորհակալություն հայտնեց բժշկական գենետիկայի ամբիոնի վարիչ, կենսաբանական գիտությունների դոկտոր, պրոֆեսոր Թամարա Սարգսյանին նմանատիպ քննարկումների կազմակերպման ուղղությամբ դրսևորած նախաձեռնողականության համար։
Երկօրյա միջոցառման շրջանակում հայ և օտարերկրացի մասնագետները կքննարկեն ժամանակակից մոլեկուլային-գենետիկ ախտորոշման առանձնահատկությունները։
Համաժողովի մասնակիցներին իրենց փորձը կներկայացնեն Բոչկովի անվան ԴՊԲԳՀ (ФГБНУ) բժշկական գենետիկայի կենտրոնի առաջատար մասնագետները։ Անդրադարձ կկատարվի նաև արհեստական բանականության թեմային։
Բացման խոսքով հանդես եկան նաև պրոֆեսոր Թամարա Սարգսյանը և ԴՆԹ-ախտորոշման լաբորատորիայի վարիչ, ՌԳԱ անդամ, պրոֆեսոր Ալեքսանդր Պոլյակովը։
Թամարա Սարգսյանը հիշեցրեց, որ Բժշկական գենետիկայի կենտրոնը Հայաստանում ստեղծվել է ավելի քան 20 տարի առաջ։
«Սա միակ կառույցն է, որտեղ զբաղվում են տարատեսակ ծանր և հազվադեպ հիվանդությունների մոլեկուլային-գենետիկ ախտորոշմամբ, կլինիկական գենետիկայով։ Հաստատված կայուն միջազգային կապերի շնորհիվ մեր կենտրոնը զարգացնում է այս բարդագույն ոլորտը մեր երկրում», – շեշտեց համալսարանական մասնագետը։
Պրոֆեսոր Ալեքսանդր Պոլյակովը ողջունեց մասնակիցներին և գոհունակություն հայտնեց համավարակի պայմաններում Հայաստանում ոչ առցանց հանդիպում կազմակերպելու առնչությամբ։ Նա ներկայացրեց «Հիպերֆենիլալանինեմիան ՌԴ-ում» զեկույցը։
Զեկույցներ ներկայացրին նաև բժշկական գիտությունների դոկտոր, Ժառանգական նյութափոխանակության հիվանդությունների և սելեկտիվ սկրինինգի լաբորատորիաների վարիչ Եկատերինա Զախարովան, կենսաբանական գիտությունների դոկտոր, պրոֆեսոր, Էպիգենետիկայի լաբորատորիայի վարիչ, Պիրոգովի անվան Ռուսաստանի ազգային հետազոտական բժշկական համալսարանի մոլեկուլային և բջջային գենետիկայի ամբիոնի պրոֆեսոր Վլադիմիր Ստրելնիկովը, բժշկական գիտությունների թեկնածու, մոլեկուլային գենետիկական ախտորոշման լաբորատորիայի բժիշկ-լաբորատոր գենետիկ, Համատեղ օգտագործման «Գենոմ» կենտրոնի ղեկավար, օրդինատուրայի և ասպիրանտուրայի ամբիոնի դոցենտ Օքսանա Ռիժկովան, բ.գ. դոցենտ, Semantic Hub-ի հիմնադիր և գործադիր տնօրեն, Արհեստական ինտելեկտի ռուսական ասոցիացիայի գիտական խորհրդի անդամ, Արհեստական ինտելեկտի եվրոպական ասոցիացիայի անդամ Իրինա Եֆիմենկոն, բ.գ.թ., պրոֆ., մանկաբույժ; գաստրոէնտերոլոգ Տատյանա Բուշուևան, ինչպես նաև բժիշկ-գենետիկ Դարիա Գուսևան։
