Կրկին ուսանողական նստարանին, կրկին հարազատ բուհում, բայց ոչ թե ապագա բժշկի, այլ 20 տարվա շրջանավարտի կարգավիճակում:
Էմիլ Գաբրիելյանի անվան 4-րդ լսարանում հրավիրված միջոցառումը նվիրված էր բժշկական համալասարանի՝ 2003 թվականի շրջանավարտների՝ բուհն ավարտելու 20 տարվա հոբելյանին: Երկու տասնամյակ անց նախկին ուսանողներն արդեն վաղուց կայացած բժիշկներ են, բայց հենց այս կրթօջախն է դարձել հաջողությունները խորհրդանշող մեկնակետը և ուսանողական լավ հիշողությունների վկան:
ԵՊԲՀ ռեկտոր Արմեն Մուրադյանը, շնորհավորելով և ողջունելով ներկաներին, նշեց, որ համալսարանում ավարտելու հոբելյանները նշելը գեղեցիկ ավանդույթ է, որն ամրացնում է կապը սերունդների միջև:
Մեծ ուրախություն է ձեզ ողջունել մայր բուհի հիշարժան և պատվաբեր դահլիճում, որը կրում է մեր ուսուցչի, անվանի բժշկապետ Գաբրիելյանի անունը: Դահլիճը ձեր պես շրջանավարտներ են կառուցել, իսկ ուսանողներն ուղղակի ներգրավված են եղել շինարարական աշխատանքներում: Համոզված եղեք, որ հայրական տունը, որը համալսարանն է ձեզ համար իր փառահեղ անցյալով, իր ամուր արմատներով՝ ի դեմս մեր ուսուցիչների ճանաչվելու է ձեզանով՝ որպես ծառի պտուղներ: Ես երջանիկ եմ, որ ձեզանից մեկն եմ, հերացիական եմ և աշխատում եմ նվիրումով: Համոզված եմ, որ դուք ևս, պատվով կրելով այդ բարձր անունը, նվիրված եք համալսարանին», – ասաց Արմեն Մուրադյանը` համառոտ ներկայացնելով նաև կյանքի կոչված բուհական ծրագրերը:
«Հաջողությունները նաև ձեր ձեռքերում են, համալսարանի ապագան շրջանավարտներն են: Ամեն անգամ, երբ կտեսնենք միմյանց, թող ջերմ հիշողությունները ձեզ հեղեղեն: Բուհը միշտ բաց է ձեր առաջ»,-ընդգծեց նա:
«Իմ դիմաց նստած են շատ կայացած անհատներ, որոնք 20 տարի առաջ պատանեկան եռանդ ունեին, բայց այդ եռանդը դեռ մնացել է ձեր աչքերում»,- նկատեց Թերապևտիկ ստոմատոլոգիայի ամբիոնի պրոֆեսոր Մարինա Մարգարյանը, ով 2001-2006թթ. Ստոմատոլոգիական ֆակուլտետի դեկանն էր:
Միջոցառմանը ներկա էին ոչ միայն Ընդհանուր բժշկության, այլև Ստոմատոլոգիական ֆակուլտետի շրջանավարտներ, որոնք ավարտել են նույն տարեթվին և համատեղ դասեր են անցկացրել ուսումնառության ընթացքում, ընկերացել:
Խոսքն ուղղելով հերացիականներին՝ պրոֆեսոր Միխայիլ Աղաջանովը վերհիշեց մի դրվագ. «Երրորդ կուրսի ուսանող էի, Անատոմիական մասնաշենքւոմ դասի էինք, դասամիջոցին դուրս եկանք բակ և տեսանք մի խումբ շատ պատկառելի բժիշկներ կանգնած էին: Տեղեկացանք, որ 20 տարի առաջ ավարտած շրջանավարտներ են և հավաքվել էին համալսարանում: Հիմա ես ձեզ նայում եմ որպես երեխաների», – ժպիտով ասաց Կենսաքիմիայի ամբիոնի վարիչը` հավելելով, որ ինքն ավարտել է բուհը 1963 թվականին` ուղիղ 60 տարի առաջ: Բուռն ծափողջյուններով մասնակիցները ողջունում էին ավագ սերնդի ներկայացուցիչներին:Ախտաֆիզիոլոգիայի ամբիոնի պրոֆեսոր Գրիզելդա Նավասարդյանը, մեջբերելով անվանի բանաստեղծ Հովհաննես Շիրազի խոսքերն, ասաց, որ իր նախկին ուսանողները սրտի մեջ են, այլ ոչ թե լեզվի վրա, իրենց միշտ հիշում է ջերմությամբ և սիրով:
Ընդհանուր բժշկության ֆակուլտետի դեկանի տեղակալ, Մանկաբարձության և գինեկոլոգիայի թիվ 1 ամբիոնի դոցենտ Նելլի Նահապետյանը ամուսնու` Վիրաբուժության թիվ 1 ամբիոնի դասախոս Վահե Հակոբյանի հետ ծանոթացել է հենց ուսանողական տարիներին:
Նշում է, որ կուրսով հավաքվել են ինչպես հինգ, այնպես էլ տասը, այնուհետև 15 տարվա հոբելյաններին, բայց համալսարանական հարկի տակ առաջին անգամ է մեկնարկում հոբելյանական հանդիպումը:
2003-ին ավարտած շրջանավարտների այս կուրսում ևս երեք ամուսնական զույգ է ձևավորվել, ինչն առավել մտերմացրել ու ամրացրել է շատերի հարաբերությունները:
Արտեմ Գրիգորյանը, Մարգարիտա Խուդավերդյանը, Սերգեյ Բաբլոյանը, Արփինե Սարգսյանը, Դավիթ Ղազարյանը, շատ ու շատ ուրիշներ այսօր հաջողությամբ շարունակում են ավագների ուղին՝ կրթելով սերունդներ, նպաստելով բժշկագիտության զարգացմանը:
Վերականգնողական բժշկության բնագավառը ներկայացնող բժիշկ Նունե Ակունցը ևս շրջանավարտների թվում էր, խոստովանեց, որ մեծ ոգևորությամբ է հետևում բուհական իրադարձություններին և հպարտանում յուրաքանչյուր գրանցած հաջողությամբ:
Շրջանավարտներից պլաստիկ և միկրովիրաբուժական ոլորտի մասնագետ Լիլիթ Ներսիսյանը ողջ կուրսի անունից շնորհակալություն հայտնեց մայր բուհին միջոցառումն անցկացնեու հնարավորությունն ընձեռելու, իսկ դասախոսներին՝ կրթելու, սովորեցնելու համար:
Հանդիպումն ավարտվեց ավանդական խմբակային լուսանկարով. շրջանավարտներին՝ բուհի նահապետների գլխավորությամբ, լուսանկարեց ռեկտորը:
