ԵՊԲՀ «ՔՈԲՐԵՅՆ» ուղեղի հիմնարար հետազոտությունների գիտակրթական կենտրոնն այսօր առաջին անգամ ընդունեց գիտությամբ ու բժշկությամբ հետաքրքրված ԵՊԲՀ «Հերացի» ավագ դպրոցի աշակերտներին, որոնք աչքի են ընկնում բարձր առաջադիմթյամբ և հաղթանակներ են գրանցել օլիմիպադներում:
«ՔՈԲՐԵՅՆ» ծրագրի ղեկավար, Գիտության գծով պրոռեկտոր Կոնստանտին Ենկոյանն աշակերտների հետ շրջայցը սկսեց կենտրոնի նախասրահից՝ աշակերտներին մանրամասն ցույց տալով և ներկայացնելով այն լուծումները, որոնք դրված են գիտության ոլորտում կարևոր առաքելություն իրականացնող կառույցի ստեղծման հիմքերում:
«Հերացի» ավագ դպրոցի տնօրեն Նարինե Սարգսյանը նշեց, որ այցին ներկա աշակերտները բժշկական բուհի ապագա ուսանողներ են, որոնք հետաքրքրված են ինչպես բժշկությամբ, այնպես էլ գիտությամբ:
Գիտության գծով պրոռեկտոր Կոնստանտին Ենկոյանը խոսելով ապագա բժիշկների մասնագիտական կողմնորոշման մասին՝ շեշտեց, որ գիտությամբ զբաղվելու և գիտնական դառնալու համար անհրաժեշտ է այդ ուղղությամբ աշխատել ուսումնառության վաղ փուլերից սկսած: «Դա կօգնի հասկանալ և բացահայտել գիտության դաշտում տեղի ունեցող գործընթացները»,-ասաց նա՝ հավելելով, որ գիտնականի աշխատանքը տարբերվում է բժշկի առաքելությունից:
«ՔՈԲՐԵՅՆ» ծրագրի ղեկավարը բժշկագիտությամբ հետաքրքրված հերացիականներին Նեյրոգիտության լաբորատորիայում հանգամանալից ծանոթացրեց գիտական կարևոր նշանակության մի շարք ուսումնասիրությունների հետ:
Դպրոցի տնօրեն Նարինե Սարգսյանի խոսքով՝ կարևորվում է դպրոց-բուհ կապը: «Բուհում իրականացվող հետազոտական և գիտական աշխատանքներին ծանոթացնելով՝ նպատակ ունենք, որ երիտասարդ սերունդը գնահատի գիտությունը, բժշկությունը, խելացի, գիտակից և պատասխանատու մոտենա այն աշխատանքին, որը վերաբերում է մարդու կյանքին և առողջությանը»,-շեշտեց նա՝ ավելացնելով, որ այս հանդիպումը նաև խրախուսանք է դպրոցի լավագույն աշակերտների համար:
ԵՊԲՀ «ՔՈԲՐԵՅՆ» ուղեղի հիմնարար հետազոտությունների գիտակրթական կենտրոն այցը շարունակվեց ԵՊԲՀ նորաբաց թանգարանում: Թանգարանի ղեկավար Նարինե Ղազարյանն աշակերտներին ներկայացրեց բժշկության պատմությունը, բժշկագիտության և բուհի ստեղծան գործում ավանդ ունեցած, իրենց կյանքը մարդկանց առողջությանը նվիրած երախտավորներին: Այցի նպատակներ էր աշակերտներին ցույց տալ, անվանի բժիշկների օրինակն ու ներդրումը, որոնց համար սպիտակ խալաթ կրելը եղել է ոչ միայն պատիվ, այլև բարձր պատասխանատվություն: