Հրակ Թորոսեանը ԵՊԲՀ ընդհանուր բժշկության ֆակուլտետի 5֊րդ կուրսի ուսանող է։ Նա սովորում է նաև Հայաստանի Ամերիկյան համալսարանի հանրային առողջապահության մագիստրոսական ծրագրով։
Ապագա բժիշկը ԵՊԲՀ Ուսանողական գիտական ընկերության նախագահի պաշտոնակատարն է և հետազոտական խմբերի ղեկավարը, ԵՊԲՀ «ՔՈԲՐԵՅՆ» թիմի անդամ։ Ծնվել է Սիրիայի Հալեպ քաղաքում։ Մեծացել է Հալեպում և հաճախել է ազգային դպրոցներ մինչև 10-րդ դասարան։
«Պատերազմի պայմաններում, հայրիկիս կորցնելուց հետո, տեղափոխվել են Սիրիայի ծովեզերյա Լաթաքիա քաղաք, որտեղ շարունակել եմ ուսումը և բարձր գնահատականով ստացել 12-րդ դասարանի դիպլոմ։ Ազատ ժամանակս սիրում եմ ընթերցել և լեզուներ սովորել։ Այդ սերը առաջացել է մայրիկիս անընդհատ քաջալերանքի և իմ առաջընթացին հետևելու շնորհիվ։ Ամառային արձակուրդները միշտ և շարունակում են լինել լեզուներ սովորելու օպտիմալ ժամանակ։ Արդեն տիրապետում եմ 5 լեզվի` հայերեն, արաբերեն, անգլերեն, գերմաներեն, և ֆրանսերեն։ Փոքր տարիքից հետաքրքրված եմ եղել կենսաբանության և անատոմիայի գաղտնիքներով»,-նշում է Հրակ Թորոսեանը։
10-րդ դասարանից իր մոտ սեր է առաջացել բժշկագիտության և հոգեբանության հանդեպ և այդ ոլորտները ուսումնասիրելու ընթացքում բացահայտել, որ բժշկությունը, համադրելով գրեթե բոլոր գիտությունները և լինելով բարձր մարդասիրական ոլորտ, իր անձնական և պրոֆեսիոնալ կյանքի կոչն է:
Նրա խոսքով, ավելի բարձրորակ և ակադեմիական առումով հագեցած բժշկական կրթություն ստանալու նպատակով 2018 թվականին որոշել է տեղափոխվել հայրենիք և ընդունվել Մխիթար Հերացու անվան պետական բժշկական համալսարանի անգլալեզու օտարերկրացի ուսանողների ընդհանուր բժշկության ֆակուլտետ։
«Ոգենշնչված հայերեն առաջին գրված նախադասությամբ' «Ճանաչել զիմաստություն և զխրատ, իմանալ զբանս հանճարոյ», ուսումնական տարիս սկսել եմ բարձր մոտիվացիայով։ Մեր բուհն, առաջին կուրսից ինձ հոգեհարազտ է: Այն պրոֆեսիոնալ երազանքներս իրականացնելու մեկնակետ է։ Համաշխարհային ուսուցման որակով ուսումնասիրությունների և մասնագիտական բարձր նշաձող ներկայացնող պրոֆեսորադասախոսակազմի շնորհիվ սկսեցի ավելի ու ավելի սիրել իմ ոլորտը»,-ասում է ուսանողը:
Հասկանալով, որ բժիշկը պետք է լինի բազմակողմանի զարգացած և տիրապետի տեսական գիտելիքների գործնական կիրառմանը՝ երկրորդ կուրսում նա միացել է Ուսանողական գիտական ընկերությանը և Երիտասարդ հետազոտողների միությանը։ Այս երկու կառույցների շնորհիվ կարողացել է զարգացնել ակադեմիական, կլինիկական, հետազոտական և մարդասիրական հմտությունները։ Այս ընթացքում միշտ հիշել է առաջին կուրսում բժշկության պատմություն առարկայի ընթացքում սովորած Ամիրդովլաթ Ամասիացու խոսքը. «Եղիր հետևող իմաստութեան հետ, Եթէ չուսանի՛ս, բժիշկ ես անգէտ»:
Հրակ Թորոսեանը հավելում է, որ, առաջ տանելով այդ աշխատանքները, երրորդ կուրսում միացել է ԵՊԲՀ «ՔՈԲՐԵՅՆ» թիմին և մինչ օրս աշխատում է գիտահետազոտական աշխատանքներ իրականացնելու ուղղությամբ։
«Սա ինձ մեծ հնարավորություն տվեց մասնակցելու հանրության օգտակար աշխատանքների, ինչպես նաև նպաստել իմ բուհի զարգացմանն ու անձի կատարելագործմանը։ Վերջապես, առանց ուժեղ բուհի, չկա լավ ուսանող, մասնագետ, և լավ ուսանող-մասնագետի պարտականությունն իր Alma mater-ը զարգացնելն է»,-նշում է ապագա բժիշկը: Նա արդեն ունի 3 հրապարակված հոդված համաշխարհային հեղինակավոր ամսագրերում։
«Իմ գործունեությամբ ես մաս եմ կազմում իմ դասընկերների և ուսանողների հմտություններն ու գիտելիքները զարգացնող կարևոր գործընթացին։ Կարծում եմ, որ 21-րդ դարում հասարակության տեղեկացված լինելը, ապագա և գործող բժշկի ամենակարևոր նպատակներից մեկն է։ Այդ մտածելակերպով դիմել և ընդունվել եմ Հայաստանի Ամերիկայն համալսարանի հանրային առողջապահության մագիստրոսական ծրագրին։ Պլանավորում եմ 2024-ին երկու համալսարաններն ավարտել և մասնագիտական ուսումս շարունակել արտերկրում։ Իսկ մասնագիտության ոլորտի համար մտածում եմ ինվազիվ սրտաբանություն կամ նյարդավիրաբուժություն»,-ամփոփում է ԵՊԲՀ սիրիահայ ուսանողը, որը ամուր կապ պահպանելով Հայաստանի հետ, արտերկրում ձեռքբերած իր գիտելիքն ու փորձը հայրենիքի ու հարազատ բուհի զարգացման ու առաջընթացին է ծառայեցնելու:
