Կայքը դեռ գտնվում է փորձարկման փուլում։
The site is still under testing.

Իրազեկում` աղիքային վարակիչ հիվանդությունների վերաբերյալ

Իրազեկում` աղիքային վարակիչ հիվանդությունների վերաբերյալ

Աղիքային վարակները հարուցվում են բազմատեսակ բակտերիաներով, վիրուսներով և մակաբույծներով, որոնք դրսևորվում են փորլուծությամբ, փսխումով, ջերմության բարձրացմամբ, փորացավով: Այս վարակները որոշ դեպքերում ընթանում են թեթև կամ անախտանշանային ձևերով, սակայն երբեմն հանգեցնում են լուրջ բարդությունների, հատկապես՝ մինչև 5 տարեկան երեխաների, տարեցների և թույլ իմունիտետով անձանց մոտ: Ըստ ԱՀԿ-ի հրապարակումների ամեն տարի աշխարհում 1.5 մլն մարդ մահանում է փորլուծային /դիարեային/ հիվանդություններից: Հարկ է նշել, որ կլիմայական փոփոխությունները, աղետները, պատերազմները բարձրացնում են աղիքային վարակների բռնկումների ռիսկերը: Վերջին տարիներին նկատվում է աղիքային վարակներով հիվանդացության բարձրացում:

Կարևոր է նշել, որ աղիքային վարակները փոխանցվում են մարդուց մարդուն ֆեկալ-օրալ մեխանիզմով: Վարակի աղբյուր են հանդիսանում հիվանդները և վարակակիրները: Վարակը կորող է փոխանցվել միկրոօր­գանիզմ­ներով բաղարկված սննդամթերքի, ջրի, հողի, կանաչիների, բանջարեղենի, կենցաղային իրերի և ճանճերի միջոցով: Կարևոր է իմանալ, որ այս վարակների հարուցիչները կայուն են արտաքին միջավայրում և կարող են գոյատևել մի քանի օրից մինչև շաբաթներ, երբեմն՝ ամիսներ, նրանք կայուն են նաև սառեցման նկատմամբ: Այդ առումով հատկապես վտանգավոր են կաթը և կաթնամթերքը, քանի որ հանդիսանում են լավ սննդային միջավայր մանրէների համար, որտեղ նրանք կարող են նաև բազմանալ: Աղիքային վարակները օժտված են սեզոնայնությամբ, հիվանդության դեպքերը զգալիորեն ավելանում են ամռան, աշնան ամիսներին: Ոստի առաջարկվում է հետևյալ կանխարգելիչ և հակահամաճարակային միջոցառումները՝ աղիքային վարակներից զերծ մնալու նպատակով.

  • Մշտապես պահպանել ձեռքերի հիգիենան, հատկապես՝ հետևողական լինել երեխաների ձեռքերի հաճախակի լվացմանը:
  • Մսի, մսամթեքի, կաթի, կաթնամթերքի բավարար ջերմային մշակում, այդ թվում՝ թարմ և սառեցված:
  • Բանջարեղենի, կանաչիների բավարար լվացում հոսող ջրի տակ:
  • Սննդամթերքը պահել սառնարանային պայմաններում, հատկապես՝ շուտ փչացող:
  • Չլողանալ դեկորատիվ ջրավազաններում:
  • Կիրառել ճանճերի դեմ պայքարի միջոցներ:
  • Չստեղծել աղբի կուտակումներ բնակավայրերում:
  • Հետևել բնակարանների սանիտարահիգիենիկ վիճակին:
  • Աղիքային վարակների կասկածելի ախտանշանների առկայության դեպքում (փորլուծություն, փսխում, ջերմություն) դիմել բժշկի խորհրդատվությանը, խուսափել ժողովրդական, ոչ բժշկական մեթոդներից, որոնք լրացուցիչ բարդությունների պատճառ կարող են դառնալ:

Առավել տարածված հարուցիչներն են՝ կամպիլոբակտերը, սալմոնելլան, աղիքային ցուպիկը, շիգելլաները, ռոտա- և նորովիրուսները: