Գիտական խորհրդի սեպտեմբերի 29-ի նիստում Հետբուհական և շարունակական կրթության գծով պրոռեկտոր Գառնիկ Ավետիսյանը ներկայացրեց այն փոփոխությունները, որոնք կորոնավիրուսային հիվանդության տարածման կանխարգելման գործընթացը պատշաճ կազմակերպելու, սանիտարական կանոնների պահանջներն ապահովելու նպատակով կատարվել են ԵՊԲՀ ներքին կարգապահական կանոններում:
Պրոռեկտորը տեղեկացրեց, որ ներքին կարգապահական կանոնների փոփոխությունները հավանության են արժանացել բուհի ռեկտորատի կողմից և սահմանված կարգով հաստատվել են: Փոփոխությունների մասին սահմանված կարգով ծանուցվել է ԵՊԲՀ բոլոր աշխատակիցներին:
Գառնիկ Ավետիսյանը հորդորեց բոլոր աշխատակիցներին պահպանել ներքին կարգապահական կանոնները՝ բուհական գործունեությունը՝ կրթական, կլինիկական և գիտական ուղղություններով պատշաճ կազմակերպելու համար:
Թեմային անդրադարձավ նաև ԵՊԲՀ ռեկտոր Արմեն Մուրադյանը: Նա նշեց, որ ներքին կարգապահական կանոններում կատարված փոփոխություններն իրենցից ներկայացնում են գործիքակազմ, որի նպատակն է հանրային առողջության տեսանկյունից անվտանգ միջավայրի ապահովումը բժշկական, կրթական հաստատություններում, պետական սեկտորում, առհասարակ հասարակության շրջանում:
Բուհի ղեկավարը շեշտեց, որ չի կարելի շահարկել խստացումները, դրանք ինքնանպատակ չեն, իսկ սանիտարական կանոններն ու անվտանգությունը պարտավոր են ապահովել բոլորը:
Նա ևս մեկ անգամ հիշեցրեց, որ 2021 թվականի ապրիլի 13-ից հետո պատվաստման գործընթացը մեկնարկել է մեր երկրում, և շատ ողբերգական մահեր հնարավոր է կանխել հենց պատվաստման շնորհիվ:
Արմեն Մուրադյանի խոսքով՝ աշխարհը կանգնած է նոր մարտահրավերների առաջ և այդ մարտահրավերներից ամենասարսափելին կորոնավիրուսն է, որն աշխարհում խլել է ավելի քան 4 մլն մարդու կյանք:
«Պատվաստվելուց հետո, այո՛, կարող են լինել նաև դեպքեր, երբ վարակված անձը հայտնվում է վերակենդանացման բաժանմունքում, կարող են լինել նաև մահվան դեպքեր, բայց խոսքը գնում է հավանականության մասին: 2000 անգամ ավելի հավանական է մահանալ, եթե պատվաստված չես, քան եթե պատվաստված ես»,- հավելեց ԵՊԲՀ ռեկտորը:
Նա կոչ արեց ինչպես բուհն ավարտող շրջանավարտներին, այնպես էլ գործող բժիշկներին կրել և փոխանցել պատասխանատվության այն բարձր զգացումը, առանց որի հնարավոր չէ պատկերացնել բժշկի առաքելությունը: