«Լևոն Օրբելու անվան» կրթաթոշակի արժանացած Ռուզաննա Առաքելյանը, ընտանքիում ունենալով բժիշկ և բժիշկ-ստոմատոլոգ հարազատներ, դեռ մանկուց որոշել էր՝ պետք է բժիշկ դառնա:
«Դպրոցում շատ եմ սիրել կենսաբանություն առարկան և միշտ ցանկացել եմ մանրամասն ու խորությամբ իմանալ մարդու օրգանիզմի անատոմիան, ֆիզիոլոգիան և բիոքիմիական գործընթացները, ինչպես նաև հասկանալ օրգանիզմում կատարվող բոլոր շեղումներն ու կարողանալ ճիշտ բուժել»,- նշում է Ստոմատոլոգիական ֆակուլտետի ուսանողը:
Ռուզաննա Առաքելյանը դպրոցական տարիներին մասնակցել է տարբեր առարկայական օլիմպիադաների, հաճախել է խմբակներ, կատարել կամավորական աշխատանքներ: Նա աշխատել է նաև տարբեր օտար լեզուներ սովորելու ուղղությամբ, որպեսզի միջազգային շփումներ հաստատի և զարգացնի Հայասատանում բժշկական ոլորտը՝ արտասահամանում փորձ ձեռք բերելու և օտարերկրյա մասնագետներին մեր երկիր հրավիրելու միջոցով:
«Դպրոցական տարիներին ունեցել եմ շատ լավ ուսուցիչներ, որոնք ինձ տվել են հիմնավոր գիտելիքներ բժշկական ընդունվելու համար: Դրա շնորհիվ համալսարան ընդունվելու և քննություններին պատրաստվելու ճանապարհն ինձ համար այնքան էլ բարդ չի եղել»,- շեշտում է ապագա ստոմատոլոգը, որը բուհում մասնակցել է մի շարք միջոցառումների, ինչպես նաև եղել եմ Ուսանողական խորհրդարանի միջազգային կապերի հանձնաժողովի ակտիվ անդամ:
Նրա խոսքով՝ համալսարանում սովորելու ընթացքում դասերից շեղվելու և հանգստանալու համար որոշել է իրականացնել կյանքի երազանքն ու հաճախել նկարչության դասընթացների: Արդյուքնում բացահայտել է՝ բավականին լավ է նկարում: «Դա թերևս անբացահայտ կմնար, եթե բժշկականում սովորելն ու գիտական ոլորտում խորանալն այդքան դժվար չլիներ»,-շեշտում է սովորողը:
Ռուզաննա Առաքելյանի կարծիքով՝ մասնագիտության ընտրությունն այնքան էական չէ, որքան ընտրած ոլորտում լավագույններից մեկը լինելու ձգտումը: «Բժշկի մասնագիտությունն ամենապատասխանատու և ամենակարևոր մասնագիտություններից մեկն է, իսկ ինձ համար շարժիչ ուժ է՝ լինել այնպիսի բժիշկ, որին պացիենտներն անվերապահորեն կվստահեն թե՛ իրենց, թե՛ հարազատների ապաքինումը»,- ասում է նա՝ ավելացնելով, որ առանց հիմնավոր և խորը գիտելիքների, հնարավոր չէ ճիշտ ախտորոշել և բուժել հիվանդությունը, իսկ գիտելիքներ ձեռք բերելու, ընդհանուր բժշկական մտածելակերպ ձևավորելու և լավ մասնագետ դառնալու համար պետք է անվերջ սովորել, իսկ բարձր առաջադիմությունն ուղղակի լավ սովորելու արդյունքն է»,-ընդգծում է ապագա բժիշկը, որը պարտավորեցնող է համարում «Լևոն Օրբելու անվան» կրթաթոշակի արժանանալը, քանի որ պետք է ավելի տքնաջան աշխատել և մնալ այդ կրթաթոշակին արժանի մասնագետ և Հայաստանի առողջապահության ոլորտում ունենալ այնպիսի ներդրում, ինչպիսիք ունեցել են անվանի բժիշկները:
Ըստ նրա՝ ստոմատոլոգիական ոլորտը լայն է և բավակինին հետաքրքիր. անընդհատ նոր ասպարեզներ են բացահայտվում և ի հայտ են գալիս նորարարություններ: Առայժմ որոշել է դառնալ ընտանեկան ստոմոտոլոգ ՝ նպատակ ունենալով հետագայում բացահայտել ստոմատոլոգիական այլ նեղ ոլորտներ, ինչպես նաև խորանալ գիտության և բերանի խոռոչի ընդհանուր հիվանդությունների բուժման մեջ:
«Հաղթահարելով բարդ ու հետաքրքիր մի շարք խոչընդոտներ, անընդհատ ինքնակրթվելով, աշխատելով և կատարելագործվելով՝ ուզում եմ ոչ միայն անընդհատ սովորել և զարգանալ նեղ մասնագիտության մեջ, այլ ուսումնասիրել և բացահայտել տարբեր բնագավառներ, քանի որ բժիշկը պետք է լավ տիրապետի և՛ իր մասնագիտությանը, և՛ լինի բազմակողմանի զարգացած ու հետաքրքիր մարդ»,-համոզված է «Լևոն Օրբելու անվան» կրթաթոշակառուն:
Նրա գնահատմամբ՝ բժիշկի մասնագիտությունը պահանջում է լինել անձնազոհ, պատրաստակամ՝ օգնել մարդկանց, շատ պատասխանատու և պարտաճանաչ, քանի որ իր աշխատանքը կապված է մարդկանց կյանքի և առողջության հետ:
«Բժիշկը պետք է միշտ մտածի ի շահ պացիենտի առողջության և բարօրության, այլ ոչ թե անձնական նախասիրությունների կամ շահերի մասին»,-ասում է նա՝ հույս հայտնելով, որ կներդրվի առողջապահական ապահովագրություն, և բոլոր քաղաքացիները, անկախ աշխատանքի վայրից, կունենանան բժշկական ապահովագրություն և ամեն տարի պարտադիր կանցնեն բուժզննում, ինչի արդյունքում մի շարք բարդ և վտանգավոր հիվանդություններ հնարավոր կլինի ճիշտ ժամանակին ախտորոշել և բուժել:
«Որպես բժիշկ շատ կուզեմ, որ գործի առցանց հարցաթերթիկներ, որի միջոցով մասնագետն անմիջապես կարող է ծանոթանալ յուրաքանչյուր պացիենտի հիվանդության պատմությանը՝ գրանցելով նաև իր կատարած աշխատանքը»,-եզրափակում է բժշկական բուհի անվական կրթաթոշակառուն: