Անժելա Կարագևորգյանը ԵՊԲՀ Մասնագիտական և շարունակական կրթության կենտրոն անեսթեզիոլոգիայի և ինտենսիվ թերապիայի ամբիոնի այս տարվա շրջանավարտ է: Կլինիկական օրդինատուրայում ուսումնառությունն ավարտել է սեպտեմբերի 19-ին ու ժամեր անց լուրերի միջոցով տեղեկացել ԼՂ-ում ստեղծված իրավիճակի մասին:
Չնայած նրան, որ վերջերս է ձեռք բերել նեղ մասնագիտացում, որպես բժիշկ հասցրել է թրծվել ինչպես 44-օրյա պատերազմում, այնպես էլ շաբաթներ առաջ Ադրբեջանի սանձազերծած ագրեսիայի և Ստեփանակերտի հարակից տարածքում պայթյունի հետևանքով ՀՀ ԱՆ համակարգմամբ տեղահանված վիրավորներին տեղափոխման, բժշկական որակյալ օգնություն տրամադրելու աշխատանքներում:
Անժելան կլինիկական օրդինատուրայում ուսումնառության սկզբից աշխատում է Երևանի շտապօգնության ծառայությունում:
Ինչպես 2020 թվականին, այնպես էլ հիմա սեփական կամքով է ներգրավվել վիրավորների տարհանման աշխատանքներում: Կարճ ժամանակահատվածում երկու անգամ է եղել Ստեփանակերտում՝ սեպտեմբերի 24-ին և 26-ին:
«Ոչ ոք անվտանգության ոչ մի երաշխիք չէր տալիս: Երկրորդ բուժառուն, որին շտապօգնության միջոցով տեղափոխել եմ որպես բժիշկ, ծայրահեղ ծանր վիճակում էր: Չնայած դժվարություններին, անորոշությանը որևէ պահի վախի զգացում չեմ ունեցել և նույնը կարող եմ գործընկերներիս մասին ասել»,- պատմում է ԵՊԲՀ շրջանավարտը` հավելելով, որ Արցախի իր կոլեգաները անգնահատելի անձնուրացություն են դրսևորել և իր աչքով տեսածն ամենագլխավոր դասն է եղել այդ օրերի թոհուբոհում:
Պատերազմի ու բռնի տարհանման բովով որպես բուժաշխատող անցնելը նրա համար անշուշտ փորձառություն էր, պատասխանատվություն, որը կատարել է պատվով և մեծ համարձակությամբ:
Քանի որ ավարտել է նպատակային կլինիկական օրդինատուրան, մասնագիտական գործունեությունը կշարունակի մարզում, զուգահեռ փորձաշրջան անցնելուց հետո ԵՊԲՀ ռեկտոր Արմեն Մուրադյանի առաջարկով կաշխատի նաև «Միքայելյան» համալսարանական հիվանդանոցի վերակենդանացման և ինտենսիվ թերապիայի բաժանմունքում` շարունակելով մարդկանց օգնելու ու մասնագիտությանը նվիրվելու հաստատակամ որոշումը:
Պատահական չէ, որ որպես մասնագիտացում ընտրել է հենց անեսթեզիոլոգիան և ռեանիմատալոգիան, քանի որ այս մասնագետների պակասը հատապես հանրապետության մարզերում մշտապես առկա է:
