Երևանի Մխիթար Հերացու անվան պետական բժշկական համալսարանի առաջնահերթություններից է կրթական ցանցի ընդլայնումը՝ միջհամալսարանական և միջմշակութային հաղորդակցության շրջանակների ձևավորման միջոցով։ Առողջապահության համաշխարհային կազմակերպությունը ԵՊԲՀ-ն ճանաչում է որպես Հայաստանի Հանրապետության միակ պետական բժշկական բուհը, որը ներառված է «Բժշկական բուհերի համաշխարհային հաշվեցուցակում» (World Directory of Medical Schools):
100-ամյա համալսարանը սերտ կապեր է հաստատել տարբեր երկրների բժշկական համալսարանների, առողջապահական և միջազգային կազմակերպությունների հետ՝ բարձրագույն բժշկական կրթության և առողջապահության բնագավառներում: Համագործակցությանն ուղղված այդ կապերը համակարգում և ընդլայնում է Միջազգային համագործակցության բաժինը, որի ղեկավար Աննա Ղազարյանի հետ զրուցել ենք միջազգայնացման գործընթացի առանձնահատկությունների, բաժնի գործունեության անխախտելի սկզբունքների, տարբեր երկրների հետ հաջողված միջբուհական փոխգործակցության և ապագա ծրագրերի մասին։
– Ե՞րբ է ձևավորվել բժշկական բուհի Միջազգային համագործակցության բաժինը։ Ի՞նչ հիմնական նպատակներ ունի և ի՞նչ խնդիրներ է լուծում։
– Միջազգային կապերի և համագործակցության բաժինը ստեղծվել է 1987 թվականին: Այն նախապատրաստում է համալսարանի և օտարերկրյա բարձրագույն ուսումնական հաստատությունների միջև համագործակցության պայմանագրերի, համաձայնագրերի և հուշագրերի նախագծերը, հետևում է դրանց իրականացման գործընթացին, ապահովում է ԵՊԲՀ կապը օտարերկրյա ուսումնական հաստատությունների, դեսպանությունների, միջազգային կազմակերպությունների հետ: Համալսարանի պաշտոնական էլեկտրոնային փոստը՝ ստուգվում և նամակագրությունն ապահովվում է հենց Միջազգային համագործակցության բաժնի կողմից: Բուհ դիմած օտարերկրյա ուսանողների և կամավորների պրակտիկան համալսարանական կլինիկաներում անցկացնելու գործընթացը նույնպես կազմակերպվում է մեր բաժնի կողմից: Այստեղ են իրականացվում Եվրոպական հանձնաժողովի կողմից ֆինանսավորվող «Էրազմուս+» ծրագրի շրջանակում Միջազգային կրեդիտային շարժունության նախագծերը:
– Կա՞ն, արդյոք, որոշակի սկզբունքներ, որոնցով բաժինն առաջնորդվում է համալսարանի միջազգայնացման ճանապարհին։
– Բաժնի անխախտելի սկզբունքներից են կրոնական, էթնիկ և ազգային խտրականության բացառումը, ինչպես նաև օտարերկրացի ուսանողներին առավելագույն ուշադրության ցուցաբերումը, որպեսզի նրանք մայր բուհում իրենց զգան որպես համալսարանական մեծ ընտանիքի լիարժեք անդամ:
– Ո՞ր երկրների բուհերի հետ է առավել կարևորվում ԵՊԲՀ միջհամալսարանական գործակցությունը։
– Մենք կարևորում ենք յուրաքանչյուր համագործակցություն, որի արդյունքում մեր ուսանողները ձեռք կբերեն գիտելիքներ, իսկ աշխատակիցները՝ մասնագիտական կատարելագործում:
– Ո՞ր պետությունների և ո՞ր համալսարանների հետ է բժշկական բուհն արդյունավետ փոխգործակցություն իրականացնում։
– Ներկայում առավել ակտիվ համագործակցություն է իրականացվում Գերմանիայի Մյունսթերի, Հանովերի և Մագդեբուրգի, Ֆրանսիայի Լիոն քաղաքիի, Փարիզի Կրետեյլ, Էքս Մարսել-2 համալսարանների հետ: Կցանկանայի առանձնացնել ուռուցքաբանության և հանրային առողջության ոլորտում Գերմանիայի Մյունսթերի համալսարանի պրոֆեսորների հետ երկարամյա համագործակցությունը, որի ընթացքում կազմակերպվել են համաժողովներ՝ Գերմանիայի և Ավստրիայի տարբեր կլինիկաների բարձրակարգ մասնագետների մասնակցությամբ, անցկացվել են ինտերակտիվ միջդիսցիպլինար և հատուկ դեպքերի քննարկումներ: Համավարակի պայմաններում ևս նույն ձևաչափով անցկացվեցին առցանց միջոցառումներ: Հուսանք, որ նոր ուսումնական տարում կկարողանանք շարունակել ավանդույթները, և համալսարանը կրկին կհյուրընկալի մեր գործընկեր համալսարանների և կլինիկաների պատվիրակություններին:
– Ի՞նչ կրթական ծրագրեր կառանձնացնեք, որոնց շրջանակում ԵՊԲՀ ուսանողները և աշխատակիցները զգալի հաջողություններ են արձանագրել։ Ընդհանուր առմամբ, բուհի քանի՞ ուսանող և քանի՞ աշխատակից է օգտվել արտասահմանում վերապատրաստվելու հնարավորությունից։
– Միջազգային համագործակցության բաժինը կարևորում է «Էրազմուս+» ծրագրի շրջանակում իրականացվող փոխանակային նախագծերում ԵՊԲՀ ընդգրկվածությունը և մեր ուսանողների ու պրոֆեսորադասախոսական կազմի արդյունավետ մասնակցությունը: Վերջին 5 տարվա ընթացքում մրցութային կարգով կրթաթոշակի արժանացած ավելի քան 40 ուսանող և կլինիկական օրդինատոր կարճաժամկետ և երկարաժամկետ ուսումնառություն են ստացել Իտալիայի, Միացյալ Թագավորության, Պորտուգալիայի, Հունաստանի, Իսպանիայի, Գերմանիայի և Ֆրանսիայի համալսարաններում՝ այնտեղ ևս ցուցաբերելով բարձր առաջադիմություն: Համալսարանի 13 աշխատակից հանդես է եկել դասախոսություններով, 7 երիտասարդ մասնագետ՝ ստացել ասպիրանտական ուսուցում և 26 աշխատակից՝ մասնագիտական կատարելագործում: Ծրագրի շրջանակում բժշկական համալսարանն ընդունել է եվրոպական բուհերի դասախոսների: Ցավոք, Հայաստանին հատկացվող տեղերը սահմանափակ են, և ծրագրից չեն կարող օգտվել է՛լ ավելի շատ ուսանողներ:
– Ի՞նչ նոր նախագծեր են սպասվում առաջիկայում։
Կրթական նախագիծ է մշակվել Ֆրանսիայի Կոտ դը Ազուրի համալսարանի հետ: Կլինիկական և ուսանողների փոխանակման ծրագրեր են մշակվում Գերմանիայի Մագդեբուրգի համալսարանի բժշկական ֆակուլտետի հետ, որի ներկայացուցիչները, Երևանում հանդիպելով մեր ուսանողներին, բարձր էին գնահատել նրանց գիտելիքները և գերմաներենի գերազանց իմացությունը: Նախատեսվում է նոր համագործակցություն նաև Ռուսաստանի Դաշնության բուհերի հետ:
Հեղինակ՝ Տաթևիկ Ղազարյան
