«Սրտային անբավարարության գարնանային դպրոց»-ը շարունակեց աշխատանքը՝ հագեցած օրակարգով:
Գերմանիայի Մագդեբուրգի համալսարանի սրտաբանության և անգիոլոգիայի կլինիկայի և «Հերացի» համալսարանական հիվանդանոցի սրտաբանական կլինիկայի մասնագետները ավագ և միջին բուժաշխատողների համար անցկացվող հավաստագրված կոնֆերանսում շարունակեցին հանդես գալ դասախոսություններով՝ ներկայացնելով իրենց պրակտիկ փորձը, բուժման մեխանիզմներն ու առանձնահատկությունները:
Սրտաբանների, թերապևտների, սրտաբանության ոլորտի բուժքույրերի, ինչպես նաև սրտաբանությամբ հետաքրքվողների հետ «Կոմորբիդ հիվանդ. քրոնիկ սրտային անբավարարություն և զարկերակային հիպերտոնիա» թեմայով կիսվեց Ընդհանուր և ինվազիվ սրտաբանության և ներքին հիվանդությունների կլինիկայի սրտաբան, Սրտաբանության ամբիոնի դոցենտ Լաուրա Սահակյանը:
Նա նշեց բուժման ալգորիթմները, հնարավոր բարդությունները, ախտանշանները, ներկայացրեց նաև կլինիկական դեպքով:
Քրոնիկ սրտային անբավարարության` 2023 թվականի թեժ թեմաներին անդրադարձավ Ընդհանուր և ինվազիվ սրտաբանության կլինիկայի ղեկավար, Սրտաբանության ամբիոնի վարիչ Համայակ Սիսակյանը:
Նրա խոսքով՝ սրտային անբարարության մասին ուղեցույցները շարունակաբար փոփոխվում են, ուստի կարիք է լինում լուսաբանելու, իրազեկելու, ներկայացնելու մասնագետների կարծիքները, քննարկումներ իրականացնել՝ բուժման արդյունավետությունը բարձրացնելու նպատակով:
Պրոֆեսորը ևս հանգամանալից անդրադարձավ հիվանդությանը՝ ընդգծելով, որ այն առավել հաճախ հանդիպում է տղամարդկանց, քան կանանց մոտ:
Կոնֆերանսի երկրորդ օրվա թեմաները աչքի էին ընկնում արդիականությամբ:
«Պահպանված արտազատման ֆրակցիայով սրտային անբավարարություն (HFpEF) – Հիվանդության կառավարման ստրատեգիաներ և զարգացող թերապևտիկ մոտեցումներ» թեման Գերմանիայի Սրտաբանության և անգիոլոգիայի կլինիկայի, Մագդեբուրգի համալսարանական հիվանդանոցի սրտաբան Նաիրա Երիցյանի դիտակետում էր:
«Սրտի ինվազիվ պատկերավորում (ձախ և աջ սրտի կաթետերիզացիա, ներանոթային ուլտրաձայն (IVUS), CardioMEMs և այլն)` սրտային անբավարարության կառավարման համար» թեմայով խոսեց Գերմանիայի Ամբուլատոր և սրտային անբավարարության ստորաբաժանման, Սրտաբանության և անգիոլոգիայի կլինիկայի բժիշկ Թարեք Բեքֆանին:
«Սրտային անբավարարության բուժում և մոնիթորինգ» թեմայով հանդես եկավ «Նորք-Մարաշ» սրտաբանական և սիրտանոթային վիրաբուժության կենտրոնի առիթմոլոգիայի ծառայության ղեկավար Տաթևիկ Հովակիմյանը:
«Աստղիկ» բժշկական կենտրոնի սրտաբանության բաժանմունքի բժիշկ Արման Դանոյանի անդրադարձը «Սարքային թերապիա CRT-/ICD սրտային անբավարարության դեպքում» թեմայով էր:
«Էնդովասկուլյար մոտեցում սրտային անբավարարության դեպքում» թեման Գերմանիայի Սրտաբանության և անգիոլոգիայի կլինիկայի ղեկավար, Մագդեբուրգի համալսարանական հիվանդանոցի սրտաբան, պրոֆեսոր Ռուդիգեր Քրիստիան Բրաուն-Դուլլեուսի ուշադրության կենտրոնում էր:
«Սրտային անբավարարության համալիր էխոկարդիոգրաֆիա» թեմային անդրադարձավ Գերմանիայի Էխոկարդիոգրաֆիայի ծառայության ղեկավար, Սրտաբանության և անգիոլոգիայի կլինիկայի, Մագդեբուրգի համալսարանական հիվանդանոցի բժիշկ Թոմաս Գրոշեկը:
Հայաստանի սրտաբանների ասոցիացիայի նախագահ, «Էրեբունի» բժշկական կենտրոնի սրտաբանության կենտրոնի ղեկավար, պրոֆեսոր Համլետ Հայրապետյանը հանդես եկավ «Քրոնիկ սրտային անբավարարություն. ուղի դեպի ԱՖ-ի բարելավումը» թեմայով:
«Սրտային անբավարարության գարնանային դպրոց» խորագրով կոնֆերանսը հագեցած էր հարցուպատասխանով, ներկաների ակտիվ մասնակցությամբ քննարկումներին, կարևորվեց նաև հայ-գերմանական հետագա համագործակցության հնարավոր ուղիները:
Հավելենք, որ մասնագիտական հավաքն աշխատանքը կամփոփի վաղը՝ կրկին մասնագետների ու թեմաների լայն ընգգրկմամբ:
«Հերացի» համալսարանական հիվանդանոցի Ինտենսիվ սրտաբանության ծառայության ղեկավար Արամ Տերտերյանը կխոսի սուր սրտային անբավարարության, ուղեցույցներում առկա նորությունների մասին:
«Սիրտանոթային և ուռուցքաբանական ռիսկերի գործոնները Հայաստանում» թեմային կանդրադառնա Գերմանիայի Կլաուդիա ֆոն Շիլլինգ կենտրոնի ղեկավար, Հանովերի բժշկական դպրոցի պրոֆեսոր Յորգ Հայերը:
Ոլորտի մասնագետները կարևորում են նաև բուժքույրերի դերը՝ սրտային անբավարարության կառավարման գործում, բազմապրոֆիլ սրտային անբավարության թիմում, ուստի անդրադարձ կկատարեն նաև «Սրտային անբավարարության բուժքույր` ճանաչումից և գնահատումից մինչև մասնագիտական վարքագծի դրսևորում հիվանդի ինքնախնամքի ու անհատական կրթության մեջ. սրտային անբավարարության մեջ մասնագիտացած բուժքույրեր» թեմային, որը հանգամանալից կներկայացնեն Գերմանիայի Սրտաբանության և անգիոլոգիայի կլինիկայի, Մագդեբուրգի համալսարանական հիվանդանոցի բժիշկներ Մ. Ալտը, Դ. Սթահլբերգը, Ք. Անքլամը:
Գերմանիայի Սրտաբանության և անգիոլոգիայի կլինիկայի, Մագդեբուրգի համալսարանական հիվանդանոցի բժիշկ Լուկաս Մոնտանուսը կխոսի «Բժշկի կարիերայի ուղին Գերմանիայում» թեմայով: «Բժշկի կարիերայի ուղին Հայաստանում» թեմային կանդրադառնա «Հերացի» հիվանդանոցի սրտաբան Մարիամ Հովհաննիսյանը:
