Օրերս ամփոփվեցին Գիտության հայկական համադպրոցական 2-րդ փառատոնի արդյունքները, որին «Հերացի» ավագ դպրոցը ներկայացել էր կենսաբանական 6 նախագծով։
Դրանք համակարգել էին կենսաբանության ուսուցիչներ Ռուբինա Հարությունյանը (3 նախագիծ), Հասմիկ Ղազարյանը (2 նախագիծ) և Արմինե Խաչատրյանը (1 նախագիծ): Բոլոր աշխատանքներն էլ մեծ հետաքրքրություն առաջացրին և բուռն քննարկումների առիթ դարձան, իսկ «Բիոպրոտեին. 3 խնդիր, մեկ լուծում» նախագիծը, որ Ռուբինա Հարությունյանի հմուտ ղեկավարությամբ իրականացրել էին Մհեր Սարաֆյանը և Մանե Կուրղինյանը, գիտական ժյուրիի կողմից արժանացավ «Կենսաբանական լավագույն նախագիծ» մրցանակին և կմասնակցի ԱՄՆ -ում կայանալիք միջազգային գիտատեխնիկական փառատոնին (International Science and Engineering Fair):
Ուսուցիչների փոխանցմամբ` Մհերը և Մանեն արդեն ակտիվ նախապատրաստվում են մեկ ամիս անց ԱՄՆ-ում լավագույնս ներկայանալու և հեղինակավոր այդ բարձր հարթակում Հայաստանը պատվով ներկայացնելու։
Փառատոնին մասնակցում էր 70 աշակերտ և նրանց գիտական ղեկավարները, ՀՀ վարչապետի աշխատակազմի ղեկավար Արայիկ Հարությունյանը, ԱԺ պատգամավորներ, ՀՀ ԿԳՄՍ նախարար Վահրամ Դումանյանը, ԿԳՄՍ նախարարի տեղակալներ Ժաննա Անդրեասյանն ու Կարեն Թռչունյանը, Գիտության կոմիտեի նախագահ Սարգիս Հայոցյանը, ԵՊՀ ռեկտոր Հովհաննես Հովհաննիսյանը, հայաստանյան գիտական կազմակերպությունների ներկայացուցիչներ։
Գիտության փառատոնին հաջորդեց մեկ այլ հեղինակավոր մրցաշար՝ AESA-ի 21-րդ ամենամյա գիտական օլիմպիադային, որը նոր հաղթանակներ բերեց «Հերացի» ավագ դպրոցին. ներկայացված երկու նախագծերը, որոնք հեղինակել են Մանե Կուրղինյանն ու Մհեր Սարաֆյանը և Լենա Մանուկյանն ու Սյուզի Սահակյանը, արժանացել են հատուկ մրցանակի, իսկ դպրոցին շնորհվել է «Տարվա դպրոց» կոչումը։
Անցյալ տարի այս նույն օլիմպիադայում կենսաբանության ուսուցիչ Ռուբինա Հարությունյանը ճանաչվել էր տարվա լավագույն ուսուցիչ։
Գիտական հեղինակավոր այս մրցապայքարում հերացիականների հաղթանակն անսպասելի չէր. դպրոցում կազմակերպվող օլիմպիական դասընթացները, բժշկական մայր բուհի դասախոսների և ուսանողների հետ ամենօրյա սերտ կապն ու համագործակցությունը, հետազոտական աշխատանքների իրականացման հարցում աշակերտներին տրամադրվող մեթոդական-գիտական տեխնիկական աջակցությունն այն ամուր հիմքն են, որից ծնվում են օլիմպիական (այդ թվում՝ միջազգային) նվաճումները։