ԵՊԲՀ հոգաբարձուների խորհրդի այսօր հրավիրված նիստը` Միքայել Ադամյանի նախագահությամբ, հագեցած էր կազմակերպչական, ֆինանասական, բուժական և ուսումնական հարցերով:
Հոգաբարձուների խորհրդի նախագահի գնահատմամբ` չնայած տարվա ընթացքում անցկացված հեռավար նիստերին այս անգամ առկա ձևաչափով նիստի առանցքում կան կարևոր հարցեր:
«Դետալային պարզաբանումներ կտրվեն կատարված և առաջիկա աշխատանքներին»,-նշեց Միքայել Ադամյանը:
ԵՊԲՀ ռեկտոր Արմեն Մուրադյանը ևս հավաստեց, որ քննարկվող հարցադրումներին բուհը մշտապես բաց, թափանցիկ սկզբունքով է անդրադառնում:
«Մեկդարյա բուհն ունի կայուն ֆինանսական հենք, իսկ առաջիկա ծրագրերը կլինիկական ոլորտում ժամանակի պահանջն ու հրամայականն են»,- ասաց Արմեն Մուրադյանը:
Ֆինանսական ուղղությամբ բուհի առաջիկա ծրագրերին հանգամանալից անդրադարձավ ԵՊԲՀ հետբուհական և շարունակական կրթության գծով պրոռեկտոր Գառնիկ Ավետիսյանը:
Մասնավորապես, առաջիկայում լիզինգային ճանապարհով ԵՊԲՀ-ն ծրագրում է «Հերացի» թիվ 1 համալսարանական հիվանդանոցի գործունեության համար գնել բժշկական սարքավորումներ` անգիոգրաֆ, ռենտգեն և լապարասկոպ:
Պրոռեկտորի փոխանցմամբ` նախաձեռնությունը քննարկվել և արժանացել է համապատասխան բանկի խորհրդի հաստատմանը:
Սարքերի ձեռքբերման կարևորությունը հիմնավորեց նաև Կլինիկական աշխատանքների գծով պրոռեկտոր Արմեն Մինասյանը` շեշտադրելով ոչ միայն բուժական, այլև համալսարանական հիվանդանոցներում բուժառուների անվտանգությանը վերաբերող հարցերը:
Հնչած հարցի շուրջ իրենց կարծիքները ներկայացրին «Հերացի» համալսարանական հիվանդանոցի ղեկավար Արեն Բաբլումյանը, Ընդհանուր և ինվազիվ սրտաբանության և ներքին հիվանդությունների կլինիկայի ղեկավար Համայակ Սիսակյանը, ինչպես նաև Հոգաբարձուների խորհրդի այլ անդամները:
Համալսարանակաները հավաստեցին, որ նոր սարքերով համալրումը բուժառուներին պատշաճ բուժօգնության տրամադրման տեսակետից է կարևոր և պայմանավորված է բուժօգնության ծավալների մեծացմամբ:
Զեկուցվեց, որ «Երևանի Մխիթար Հերացու անվան պետական բժշկական համալսարան» հիմնադրամի 2022թ. համախմբված ֆինանսական հաշվետվություններն անկախ աուդիտորի դրական եզրակացությանն են արժանացել:
Նիստի ավարտին ԵՊԲՀ ռեկտոր Արմեն Մուրադյանն ընդգծեց, որ ուսումնական տարվա ընթացքում անկախ ձևաչափից խիստ կարևոր է համալսարանի կառավարման մարմնի յուրաքանչյուր ներկայացուցչի աշխատանքն` հօգուտ բուհական խնդիրների օպերատիվ լուծման և առաջընթացի:
Այսօր արծարծված հարցերը նա որակեց որպես առանցքային, կենսունակ:
Ուսումնական տարին ավարտվում է, հուլիսի 4-ը պետական ավարտական քննությունների վերջին օրն է: Որպես ընթացիկ տարվա կարևոր ձեռքբերում` ռեկտորը մատնանշեց միջազգային ծրագրային հավատարմագրման համար ԵՊԲՀ-ի դիմումը Բժշկական կրթության համաշխարհայի ֆեդերացիային:
Կլինիկական ոլորտից զատ, մեկդարյա կրթագիտական հաստատության առաջ նաև գիտական, ուսումնական ուղղություններով հսկայական անելիքներ կան:
Խոսվեց նաև 2023-2024 ուսումնական տարում նախատեսվող «Մանկաբուժություն» մասնագիտությամբ ռեզիդենտուրայի պիլոտային ծրագրի ներդրման մասին:
Նիստի մեկնարկին բուհի ղեկավարությունը շնորհավորեց Կենսաքիմիայի ամբիոնի վարիչ, պրոֆեսոր, Հոգաբարձուների խորհրդի անդամ Միխայիլ Աղաջանովին ծննդյան օրվա առթիվ` մաղթելով ամենայն բարիք:
Ամփոփելով Միքայել Ադամյանն ընդգծեց, որ քննարկումն արդյունավետ էր` կարծիքների փոխանակման, հեռանկարների և ծառացած խնդիրների լուծումների ուրվագծման տեսակետից: