2024թ.-ի սեպտեմբերի 28-ին նշվում է կատաղության դեմ պայքարի թվով 18-րդ համաշխարհային օրը: Այս տարի այն նշվում է «Հաղթահարելով կատաղության սահմանները» խորագրով, որն ընդգծում է մեկ անձի առողջությունը բոլորի առողջությունն է սկզբունքը:
Կատաղությունը հանրային առողջության լուրջ խնդիր է աշխարհի ավելի քան 150 երկրներում, հատկապես` Ասիայում և Աֆրիկայում:
Այն վիրուսային, զոոնոզ, հնագույն հիվանդություն է, որից տարեկան մահանում են տասնյակ հազարավոր մարդիկ, այդ թվում 40%-ը՝ 15 տարեկանից ցածր երեխաներ: Հարկ է նշել, որ կատաղության վիրուսը ախտահարում է կենտրոնական նյարդային համակարգը՝ հանգեցնելով 100% մահվան ելքի:
Ուստի այս խորագիրը հստակ կոչ և հորդոր է նորարարական ռազմավարությունների, ինչպես նաև տարբեր ոլորտներում ու տարածաշրջաններում համագործակցության ստեղծման անհրաժեշտության համար: Այն ընդգծում է «Մեկ առողջություն» ռազմավարության կարևորությունը՝ մարդկանց, կենդանիների և շրջակա միջավայրի անվտանգության պահպանման համար: Այն միավորում է առողջապահական կազմակերպությունները, անասնաբուժական ծառայությունները, կառավարությունը և համայնքները: Հաղթահարելով սահմանները՝ կարող ենք հաղթահարել աշխարհագրական, սոցիալ-տնտեսական և կրթական խոչընդոտները՝ ապահովելով պատվաստումների վերաբերյալ իրազեկվածության ընդլայնումը և բուժօգնության հասանելիությունը:
Այս միասնական մոտեցումը կարևոր նշանակություն ունի կատաղության դեմ պայքարում՝ նպաստելով մեկ համակարգի ստեղծմանը, որտեղ այս հիվանդությունն այլևս սպառնալիք չէ ո՛չ մարդկանց, ո՛չ կենդանիների համար:
Այս խորագիրը նաև ներառում է հավասարության կարևորությունը և առողջապահական համակարգերի ամրապնդումը՝ ապահովելով միասնական առողջապահության հասանելիությունը բոլորի համար:
Կենդանիներից մարդկանց փոխանցվող կատաղության մահվան դեպքերը վերացնելու նպատակով ԱՀԿ-ի կողմից մշակվել և ներդրվել է «Դեպի զրոյական 30» գլոբալ ռազմավարական ծրագիրը, որը պետք է իրականացվի մինչև 2030թ.-ը:
Ուսանողները «Բժշկությունը 5 րոպեում» շարքի շրջանակում ինֆորմատիվ նյութ են պատրաստել։