Տավուշի մարզի տասը ավագ դպրոցի աշակերտներ ԵՊԲՀ «ՔՈԲՐԵՅՆ» ուղեղի հիմնարար հետազոտությունների գիտակրթական կենտրոնի հյուրերն էին:
Երիտասարդ գիտնականներ-հետազոտողներ, «ՔՈԲՐԵՅՆ» թիմի անդամներ Կատարինե Ֆերեշետյանը, Մարիամ Մովսիսյանը, Համլետ Թորոսյանը և Էլլա Բաղդասարյանը դպրոցականների համար հագեցած ծրագիր էին պատրաստել:
Երկու ժամ տևողությամբ ծրագրի մեկնարկին մասնակիցներին ողջունեց կենտրոնի գլխավոր գիտաշխատող, բժշկական բուհի Գիտության գծով պրոռեկտոր Կոնստանտին Ենկոյանը:
«Ինչո՞ւ եք եկել այստեղ» ,- առաջին հարցն էր, որը պրոֆեսոր Ենկոյանն ուղղեց լսարանին` շեշտադրելով, որ Երևանի Մխիթար Հերացու անվան պետական բժշկական համալսարանի նպատակն է պատրաստել որակյալ բժիշկներ` զուգահեռ զարգացնելով բժշկակենսաբանական բնագավառը:
«Կենտրոնը, որտեղ այժմ գտնվում եք, բժշկական համալսարանի գիտական հենասյունն է»,- փաստեց նա` մարզաբնակ ապագա կոլեգաներին մաղթելով լինել պրպտուն, հետաքրքրասեր:
Պրոֆեսորն անդրադարձավ արդի աշխարհի զարգացման միտումներին, որոնցում առանցքային դեր ունի ԲՏՃՄ ուղղությունը: «Այս ուղղության առաջընթացով են պայմանավորված բժշկության, դեղագործության զարգացումները, տեխնոլոգիական և ճարտարագիտական նորագույն լուծումները», – նշեց նա՝ հավելելով, որ տարիներ շարունակ ԲՏՃՄ ուղղության զարգացման բեռը կրում էին հիմնականում արական սեռի ներկայացուցիչները, իսկ այսօր այդ պատասխանատվությունը կիսում են կանայք՝ գրանցելով լուրջ հաջողություններ:
Նշենք, որ դպրոցականները «Հզոր Միտք» հասարակական կազմակերպության և Հայ օգնության ֆոնդի համատեղ գործակցության միջոցով այցելեցին բժշկական բուհ «Գիտաճամբար» նախագծի շրջանակում:
Հասարակական կազմակերպությունը հինգ տարի է գործունեություն է ծավալում՝ մարզերի երիտասարդների անձնային աճին նպաստելով և համահայկական երիտասարդական ցանց ստեղծելով:
«Գիտաճամբար»-ի 28 մասնակցի համար կազմակերպվեց շրջայց լաբորատորիաներում, հանդիպում-քննարկում:
Փոքրիկ տեսանյութը ներկայացրեց գիտակրթական կենտրոնի հիմնական ուղղությունները, իսկ ավարտին ուսուցողական խաղ կազմակերպվեց՝ հաղթողով:
