Պրակտիկ գիտելիք և հմտություն. այն հիմնական սկզբունքներն են, որոնք դրված են Հանրային առողջության ֆակուլտետի ուսումնառության հիմքում: Մայիսի 17-ին ֆակուլտետում բաց դռների օր էր կազմակերպված` նպատակ ունենալով մասնակիցներին ծանոթացնել առարկաներին ու հետագա հնարավորություններին:
Հանրային առողջության ֆակուլտետի դեկան Մարինե Հովհաննիսյանը ներկայացնելով «Առողջապահության կազմակերպում և կառավարում» մագիտրոսական ծրագիրը տեղեկացրեց, որ այն ունի հստակ առաքելություն և տեսլական:
«Մեր նպատակն է պատրաստել հանրային առողջապահության մասնագետներ, որոնք ժամանակակից գիտելիքի և ունակությունների շնորհիվ ունակ են իրականացնելու անհրաժեշտ բարեփոխումները ոլորտում` միտված բնակիչության առողջության պահպանմանը և ամրապնդմանը»,- ասաց նա` որպես տեսլական մատնանշելով բնակչության բարեկեցության առաջնահերթությունների ապահովումը և առողջապահության հասանելիության հավասար պայմանները:
Դեկանը շեշտեց` ոչ միայն այս, այլև մագիստրոսական մյուս ծրագրերի շրջանավարտներն այսօր առողջապահական համակարգում առաջատար զբաղվածություն ունեն, աշխատում են պետական սեկտորում, միջազգային և մասնավոր հաստատություններում:
Առողջապահության կազմակերպման բնագավառում մեծ փորձ ունեցող մասնագետ, Հանրային առողջապահության մագիստրոս, ԱՄՆ կառավարության «Խաղաղության կորպուս»-ի բժշկական ծառայության ղեկավար Նաիրա Ղարախանյանն (Director of Volunteer Health) արդեն 12 տարի աշխատում է Հանրային առողջության ֆակուլտետում` համալսարանական այս ստորաբաժանման հիմնադրման հենց սկզբից:
«Տարեցտարի տեսնում եմ շատ ավելի գրագետ, ավելի ոգեշնչված ուսանողներ, շատ որակյալ ավարտական աշխատանքներ, որոնք բարձր եմ գնահատում»,- միջոցառմանն իր կարծիքն արտահայտեց դասախոսը` հավելելով, որ ֆակուլտետի ուսանողների շրջանում մեծ առաջընթաց է նկատում:
Հանրային առողջությունը գործունեության լայն դաշտ է, որտեղ սինթեզված են ինչպես կրթական, այնպես էլ սոցիալական, իրավական, այլ ուղղություններ: Նրա հիմնական ցանկությունն է, որպեսզի ավարտողները գտնեն իրենց համապատասխան աշխատանք այս բնագավառում:
Հանրային առողջապահության մասնագետ, ֆակուլտետի դասախոս Մարտին Ալեքսանյանն ընդգծեց, որ տեսական գիտելիքից զատ այստեղ առանձնանում է գործնական բաղադրիչն ու փորձը, դասախոսները ուսանողներին որպես կոլեգաներ են մոտենում:
Արևիկ Ստեփանյանը Ուռուցքաբանության ազգային կենտրոնի կլինիկական հետազոտությունների և քաղցկեղի ռեգիստրի բաժնի ղեկավարն է: Բժշկական բուհի Ընդհանուր բժշկության ֆակուլտետն ավարտելուց հետո նա իր մասնագիտական ուղին շարունակել է Հանրային առողջության ֆակուլտետում` ցանկանալով ոչ միայն նեղ բժշկական մասնագիտությամբ աշխատել, այլև առավել մեծ ոլորտում, որն ունի լայն հնարավորություններ:
«Իմ կյանքում կարևոր էր այս ֆակուլտետն ավարտելը, քանի որ այն տվեց ինձ այն պրակտիկ և տեսական գիտելիքը, որը ես այսօր օգտագործում եմ իմ առօրյա աշխատանքում»,- ասաց ֆակուլտետի շրջանավարտը:
Հանրային առողջության ֆակուլտետ կարող են ընդունվել, ինչպես բժշկական, այնպես էլ ոչ բժշկական կրթությամբ դիմորդներ (առնվազն բակալավրի աստիճանով):
«Առողջապահության կազմակերպում և կառավարում» մագիստրոսական ծրագրի շրջանակներում ուսանողները ստանում են խորը և բազմակողմանի գիտելիքներ հանրային առողջության և առողջապահության կազմակերպման վերաբերյալ: Հանրային առողջության ֆակուլտետի դասախոսական կազմը համալրված է ԵՊԲՀ պրոֆեսորադասախոսական անձնակազմի և հրավիրված մասնագետներից` ՀՀ առողջապահության նախարարությունից, Հիվանդությունների վերահսկման և կանխարգելման կենտրոնից, միջազգային կազմակերպություններից (Global Fund, WHO, Red Cross, World Vision, UNICEF, UNAIDS, Peace Core, Oxfam, Clean Choice և այլն):
Ֆակուլտետն ուսանողներին տրամադրում է 5 անվճար տեղ, որոնց կարող են դիմել միայն այս տարվա շրջանավարտները: Ընդունելության դիմումներն ընդունվելու են 2024թ-ի հունիսի 16-ից մինչև օգոստոսի 25-ը: Անվճար տեղերի համար դիմումներն ընդունվելու են 2024թ-ի հունիսի 17-ից մինչև հուլիսի 4-ը ներառյալ:
Ընդունելությունն իրականացվում է հարցազրույցի և ՄՈԳ-ի հիման վրա: Ծրագրի ավարտին շնորհվում է հանրային առողջապահության մագիստրոսի որակավորում (MPH):
Նշենք, որ Հանրային առողջության ֆակուլտետի մագիստրոսական ծրագրերի տևողությունը 1,5 տարի է: Որպեսզի ուսանողները կարողանան համատեղել ուսումը աշխատանքի կամ օրդինատուրայի հետ դասերը ֆակուլտետում անցկացվում են շաբաթական 3 օր, երկու հերթով: Դասերի հերթն ընտրում է ուսանողը:
Դիմորդները կարող են ներկայացնել անհրաժեշտ փաստաթղթերը Հանրային առողջության ֆակուլտետի դեկանատ (վարչական մասնաշենք 3-րդ հարկ):
