«Հերացի» համալսարանական հիվանդանոցի բուժաշխատողները մասնագիտական օրվա շրջանակում այսօր արյան դոնորության հանրօգուտ նախաձեռնությամբ հանդես եկան:
«Միջոցառման գլխավոր նպատակն այն է, որ արյան դոնորությունը շարունակական պրոցես է և չի սահմանափակվում միայն մեկ օրով` հունիսի 14-ով: Արյուն միշտ պետք է և անվարձահատույց դոնորության տարածմանն ուղղված նախաձեռնությունները պարբերական են: Բժիշկներն այսօր որոշել են իրենց արյունը նվիրել իրենց իսկ պացիենտների կյանքի փրկությանը»,- կոլեգաներին հանրապետությունում հունիսի 21-ին նշվող Բուժաշխատողի օրվա առթիվ շնորհավորելով մանրամասնեց համալսարանական համալիրի Կլինիկական ախտորոշիչ լաբորատորիայի ղեկավար, Արյունաբանական կետի պատասխանատու Գայանե Պետրոսյանը:
Շուրջ երկու տասնյակ համալսարանական, ոչ միայն տարբեր բաժանմունքների, պոլիկլինիկայի բուժաշխատողներ, ղեկավար կազմի ներկայացուցիչներ, այլև սովորողներ` կլինիկական օրդինատորներ մասնակցեցին վաղ առավոտից մեկնարկած արյունատվությանը:
Արյունաբանական կետի թերապևտ, հիվանդանոցի ապահովագրական հարցերի ծառայության ղեկավար Աննա Կարապետյանի կարծիքով` բուժաշխատողները ոչ միայն բուն իմաստով են կյանքեր փրկում, այլև արյուն հանձնելով, որը նույնպես կյանք փրկելու խորհուրդ ունի:
Արտյոմ Աբովյանը` Անեսթեզիոլոգիայի և ինտենսիվ թերապիայի ամբիոնի կլինիկական օրդինատոր է, նաև Ընդունարանի և անհետաձգելի բուժօգնության բաժնի հերթապահ բժիշկ:
Կրկին մարդկանց օգնելու ցանկությունն է նրան մղել մասնակցել այս միջոցառմանը` ինչպես նաև տարիներ առաջ` պատերազմի օրերին:
Նույն բաժնի վիրակապարանի բուժքույր Անահիտ Շահինյանը նույնպես դոնորների շարքում էր.
«Նախկինում ևս հանձնել եմ արյուն: Որոշեցի այսօր էլ մասնակցել և՛ այլոց օգնելու, և՛ իմ առողջության պահպանման համար, քանի որ հայտնի է, որ դոնորը կրկնակի օգուտ է բերում և իրեն, և նրան, ում փոխներարկում են նրա արյունը»:
Ամփոփելով հագեցած, հետաքրքիր օրը ևս մեկ անգամ ընդգծենք, թե ինչու է օգտակար արյան դոնոր լինելը:
Պարբերաբար արյան դոնոր դարձողների մոտ ավելի հազվադեպ է գրանցվում սրտամկանի ինֆարկտ:
Օրգանիզմն արյան կորստի նկատմամբ դառնում է կայուն:
Խթանվում է արյան արտադրությունը և օրգանիզմն ավելի է երիտասարդանում:
Տեղի է ունենում իմունային և մարսողական համակարգի, ենթաստամոքսային գեղձի, լյարդի և աթերոսկլերոզ հիվանդությունների կանխարգելում:
Բեռնաթափվում են փայծաղն ու լյարդը:
Դոնորները սովորական մարդկանցից միջին հաշվով 5-8 տարով ավել են ապրում:
