Սիրիայի ուսանողական օրն այսօր տոնական միջոցառմամբ նշվեց բժշկական համալսարանում: Ամեն տարի մարտի 30-ին անցկացվում են տարաբնույթ միջոցառումներ, որոնց նպատակն է միավորել աշխարհի տարբեր երկրներում ապրող սիրիացիներին, ներկայացնել նրանց մշակույթն ու հարուստ պատմությունը: Միջոցառմանը ներկա էր ՀՀ-ում Սիրիայի Արաբական Հանրապետության գործերի ժամանակավոր հավատարմատար Մհդ Իսսամ Նայալին, ով ողջունելով սիրահայ ուսանողներին՝ շեշտեց, որ երիտասարդները Սիրիայի ապագան են, վաղվա օրը:
Նշվեց, որ ուսանողները յուրաքանչյուր երկրի պարիսպն են, որոնք իրենց գիտելիքների շնորհիվ կարող են ապահովել տարբեր ոլորտների զարգացումը: Նման միջոցառումների միջոցով Սիրիայի մշակույթն ավելի է մոտենում հայ հասարակությանը, հայ ուսանողին:
Սիրիացի ուսանողներն իրենց կարևոր տեղն ու դերն ունեն բժշկական համալսարանում սովորող ուսանողների շարքում: Նրանցից շատերն աչքի են ընկնում իրենց բարձր առաջադիմությամբ ու բժիշկ դառնալու դժվարին գործում ջանք ու եռանդ չեն խնայում:
Միջոցառումը նախաձեռնել էր Հայաստանում Սիրիայի ուսանողական միությունը՝ Հայաստանում Սիրիայի դեսպանատան հետ համատեղ: Երաժշտական կատարումներով ելույթ ունեցան ոչ միայն բժշկական համալսարանում, այլև այլ բուհերում սովորող ուսանողներ: Միջոցառումը մեկնարկեց երկու երկրի օրհներգերով: