Երևանի Մխիթար Հերացու անվան պետական բժշկական համալսարանի կազմում գործող ԵՊԲՀ քոլեջը շարունակում է ընդլայնել միջին մասնագիտական կրթություն իրականացնելու շրջանակը, ինչպես նաև ծրագրում է 2024-2025 ուսումնական տարում ներդնել անգլալեզու և ռուսալեզու կրթական ծրագիր, ինչը հնարավորություն կտա ավելի շատ ուսանողներ ներգրավել արտերկրից:
ԵՊԲՀ քոլեջի տնօրեն Ալեքսան Հովհաննիսյանը ներկայացնում է իր կողմից ղեկավարվող կրթական կառույցի գործունեությունը, առաջնահերթություններն ու առաջիկայում ներդրվող ծրագրերը:
-Ինչու՞ ընտրել ԵՊԲՀ քոլեջը: Ի՞նչ ակնկալիքներով են ընդունվում և ավարտում ուսանողները:
-Քոլեջն, ինչպես գիտեք, գործում է բժշկական համալսարանի ենթակայության ներքո, ինչը հնարավորություն է տալիս, որ ուսանողներին դասավանդի բուհի դասախոսական կազմը: Դասընթացներն անցկացվում են բժշկական համալսարանի ամբիոններում և կլինիկաներում:
Միջին մասնագիտական կրթական այս հաստատությունը պատրաստում է այնպիսի մասնագետներ, որոնք մասնագիտությամբ աշխատելու համար հետագայում չեն ունենա անհատական ուսուցման անհրաժեշտություն և ձեռք կբերեն աշխատանքային փորձ՝ սկսած ուսանողական տարիներից:
Բոլոր մասնագիտություններով ուսանողներն իրենց գործնական հմտություններն անցնում են համալսարանական հիվանդանոցներում, կատարում կամավորական աշխատանքներ: Դա կարևոր հանգամանք է բժշկագիտության մեջ՝ միջին մասնագիտական բժշկական կրթության ոլորտում, որը բացի գիտելիքից սովորողին տալիս է պրակտիկ հմտություններ՝ առանցքային դեր խաղալով հետագա գործունեության ընթացքում:
Դիմորդներն ընդունվում են լավ մասնագետ դառնալու ակնկալիքով, ինչը, կարծում եմ՝ բավարարվում է ուսումնառության ընթացքում:
-Քոլեջն ընդլայնում է միջին մասնագիտական կրթություն իրականացնելու շրջանակը: Որո ՞նք են քոլեջի առաջնահերթությունները:
-Վերջին 4 տարում քոլեջի ուսանողների թիվն աճել է մի քանի անգամ: Ներդրվել է «Պրոթեզիստ-օրթեզիստ-տեխնիկ» մասնագիտությունը: Նախկինում Հայաստանում պրոթեզիստների միջին մասնագիտական կրթություն չի իրականացվել: Այն արդի դարձավ 44-օրյա պատերազմից հետո: Քոլեջի առաջին շրջանավարտները բարեհաջող ավարտելուց հետո՝ աշխատանքի են անցել «Զինվորի տուն» վերականգնողական կենտրոնում: Լավագույն շրջանավարտները հնարավորություն ունեն իրենց ստացած գիտելիքը փոխանցել այս մասնագիտությունն ընտրած հաջորդ սերունդներին:
Իսկ այս ուսումնական տարում կներդրվի «Ստոմոտոլոգիական գործի բուժքույրեր» մասնագիտությունը: Ուսումնասիրելով աշխատաշուկան՝ հաշվի առնելով նաև միջազգային փորձը, հասկացանք, որ մեր երկրում կրթական առումով այդ ոլորտը բաց է: Ձեռնամուխ եղանք ներդնել այդ ուղղությունը. առաջին կուրսից ուսանողները ձեռք կբերեն մասնագիտական հմտություններ, որոնք առաջնային են որպես ստոմոտոլոգի բուժքույր աշխատանքի համար:
-Ի՞նչ առավելություններ ունեն այստեղ սովորող ուսանողները: Ավարտելուց հետո ի՞նչ հնարավորություն են ստանում շրջանավարտները:
-Ոտք դնելով ԵՊԲՀ դառնում են հերացիական՝ հետագայում իրենց գործունեությունը ծավալելով մեր հիվանդանոցներում: Համալսարանական երեք հիվանդանոցներում, գրեթե բոլոր մասնագետներին, ատամնատեխնիկները՝ ստոմոտոլոգիական կլինիկաներում, բուժքույրները՝ հիվանդանոցներում, լաբորատոր ախտորոշողները՝ լաբորատորիաներում աշխատելու հնարավորություն է տրվում:
Ամեն տարի շրջանավարտները համալրում են բուժանձնակազմի շարքերը:
– Շրջանավարտները հնարավորություն ունե՞ն կրթությունը շարունակել բուհում:
– Հիմնական ընդհանուր կրթական հիմքով ընդունվածների (9-րդ դասարանի) մեծ մասը՝ գրեթե 90 տոկոսը, ցանկանում են կրթությունը շարունակել ԵՊԲՀ-ում: 2020 թվականին արված կրթակական ծրագրերի փոփոխության արդյունքում 2024 թվականի գերազանց առաջադիմությամբ շրջանավարտներն իրավունք են ստացել կրթությունը շարունակել ԵՊԲՀ համապատասխան ֆակուլտետի 2-րդ կուրսում: Սա արդարացված որոշում է, քանի որ ուսումնառության 4 տարվա ընթացքում ուսանողը, որպես հերացիական, կոփվում է և կարող է դառնալ բժշկական համալսարանի ուսանող:
Միջնակարգ ընդհանուր կրթական հիմքով ընդունվածների (12-րդ դասարանի) մեծ մասն աշխատանքի է անցնում համալսարանական բուժհաստատություններում:
-Ո՞ր մասնագիտություններն են առավել պահանջված:
-Դիմելիությունը բարձր է «Քույրական գործ», «Ատամնատեխնիկական գործ», մասնագիտություններով, վերջին տարում՝ նաև «Դեղագործություն» մասնագիտությամբ: Բժշկական համալսարանի ռազմավարության շրջանակում առաջնահերթություն է միջազգային շուկա կրթության արտահանման հարցը, ինչը մեզ կդարձնի ավելի մրցունակ:
Մենք շարունակում ենք ընդլայնել արտերկրի գործընկերների շրջանակը, մասնավորապես, Գերմանիայի Դաշնության քոլեջների հետ: Նպատակ ունենք կրթական ծրագրերի, ուսանողների փոխանակման ծրագրեր իրականացնել:
Դա հնարավորություն կտա զարգացնել իմացությունը, գործնական հմտությունները, ինչպես նաև այնտեղի փորձը կներդրվի այստեղ:
-ԵՊԲՀ քոլեջն ունի՞ ուսանողներ արտասահմանից:
-Այս պահին քոլեջն ունի շուրջ 70 ուսանող արտերկրից: Կարևոր ենք համարում քոլեջում անգլալեզու և ռուսալեզու կրթական ծրագրերի ներդրումը, ինչը հնարավորություն կտա մեզ դառնալ միջին մասնագիտական կրթությունն արտահանող կրթական կառույց: