Հոկտեմբերի 12-ը արթրիտի դեմ պայքարի համաշխարհային օրն է:
ԵՊԲՀ Ուսանողական խորհրդարանի ուսումնամեթոդական հանձնաժողովը և Ռևմատոլոգիայի ամբիոնը արթրիտի դեմ պայքարի համաշխարհային օրվա շրջանակում անցկացրին ինտերակտիվ դասախոսություն-քննարկում արթրիտների վերաբերյալ: Դասախոսություններով հանդես եկան Ռևմատոլոգիայի ամբիոնի ասիստենտներ Լիլիթ Սևոյանը և Սյուզաննա Բազեյանը։
«Արթրիտների ախտորոշման մարտավարությունը ռևմատոլոգիայում» խորագրով զեկույցի ընթացքում Լիլիթ Սևոյանն անդրադարձավ բժշկության ոլորտներից մեկի՝ ռևմատոլոգիայի սահմանմանը, առանձնացրեց ռևմատիկ հիվանդությունների տեսակները։ «Մոտ 60-90 միլիոն մարդ աշխարհում տառապում է ոսկրամկանային հիվանդություններով», – ընդգծեց ասիստենտը։
Խոսելով ռևմատոլոգիական հիվանդության ախտորոշման երկքայլ մոտեցման մասին՝ Լիլիթ Սևոյանը նշեց, որ առաջին քայլն իրենից ներկայացնում է հիմնական ախտանիշների, իսկ երկրորդը՝ կոնկրետ հիվանդության հայտնաբերումը։
Սյուզաննա Բազեյանը հանդես եկավ «Արթրիտը՝ որպես հիվանդության դեբյուտ» վերտառությամբ զեկույցով՝ անդրադառնալով արթրիտների ընդհանուր բնութագրին և դրանց տեսակներին։
