Ուսումնական, կլինիկական և կազմակերպչական բազմաթիվ հարցերով հագեցած այսօր հրավիրված ռեկտորատի նիստին ԵՊԲՀ ստորաբաժանումների ղեկավարները բժշկական բուհի ռեկտորին զեկուցեցին կատարված աշխատանքների և առաջիկա անելիքների մասին։
Նիստի մեկնարկին ռեկտորատի անդամներին ներկայացվեցին ԵՊԲՀ ընդհանուր բժշկության, ստոմատոլոգիական և դեղագիտական ֆակուլտետների այս ուսումնական տարվա 5-րդ և 6-րդ կուրսերի անվանական տասը կրթաթոշակառուները, որոնց թեկնածությունն առաջիկայում կհաստատվի Գիտական խորհրդի կողմից։
Շնորհավորելով անվանական կրթաթոշակի հավակնորդ ապագա բժիշկներին՝ Արմեն Մուրադյանը շեշտեց, որ կրթաթոշակառուները պետք է տեսանելի լինեն համալսարանականների համար՝ որպես ուսանողության սերուցք։
«Հույս ունեմ, որ կպահեք կապը հարազատ բուհի հետ և գուցե տասնամյակներ հետո ձեր անունով ևս բժշկական համալսարանում անվանական կրթաթոշակներ կտրվեն»,-նշեց ռեկտորը՝ հավելելով, որ համալսարանը մասնագիտական նախաձեռնություններում ամուր կանգնած է նրանց կողքին։
Դեկաններն անվանական կրթաթոշակառուներին ներկայացնելիս նրանց բնորոշեցին որպես պարտաճանաչ և պատրաստակամ սովորողների։
Ռեկտորատի ավարտին՝ ծանրաբեռնված, անձնվեր և բարեխիղճ աշխատանքի համար ԵՊԲՀ շնորհակալագրի արժանացան «Հերացի» թիվ 1 համալսարանական հիվանդանոցի անհետաձգելի բուժօգնության ծառայության բժիշկ Սաթենիկ Սարուխանյանն ու մայրապետ Անահիտ Առաքելյանը:
Բուհի ղեկավարը կատարած աշխատանքի համար երախտիքի խոսք հղեց բուժաշխատողներին՝ ընդգծելով, որ համատեղ ջանքերի շնորհիվ համավարակի և պատերազմի դժվարին օրերին համալսարանական հիվանդանոցների բուժանձնակազմը ձևավորել են մեկ ընդհանուր ճակատ, որը պայքար է մղում առողջության և կյանքերի փրկության համար։
Քննարկվեցին ընթացիկ այլ հարցեր, տրվեցին հանձնարարականներ։
Եվս մեկ անգամ կարևորվեց հակահամաճարակային կանոնների պահպանումը համալսարանական տարածքներում։
