Բժշկական 100-ամյա բուհում ավելի քան 8 տասնամյակ իր գործունեությունն է իրականացնում Ֆիզիկական դաստիարակության ամբիոնը: Այն հիմնադրվել է 1938 թվականին՝ որպես Ֆիզիկական դաստիարակության և բուժական ֆիզկուլտուրայի ամբիոն համալրել է Երևանի պետական բժշկական ինստիտուտում գործող ամբիոնների շարքը՝ ղեկավարվելով Գուրգեն Մինասյանի կողմից: 1941-ին` Մեծ Հայրենական պատերազմի սկզբին, այն լուծարվել է, որի գործունեությունը վերականգնվել է 1946 թվականին։ Մինչև 1955-ն այն ղեկավարել է Հարություն Գարգալոյանը, այնուհետև մինչև 1965թ.՝ կրկին Գուրգեն Մինասյանը: 1965-ին այն բաժանվելով երկու ինքնուրույն՝ ֆիզդաստիարակության ու սպորտի և բժշկական վերահսկողության ու բուժական ֆիզկուլտուրայի ամբիոնների շարունակել է ակտիվ գործունեությունը, որի կայացման գործում մեծ ներդրում է ունեցել նաև դոցենտ Էդուարդ Ավագյանը՝ այն ղեկավարելով 1965-1992 թվականներին:
1989-ին վերանվանվելով Ֆիզդաստիարակության և առողջության ամբիոնի այն 10 տարի անց՝ 2009-ին լուծարվել է, որի փոխարենը ստեղծվել է սպորտային բժշկության և սպորտի ամբիոնը, որը 2010-ին վերափոխվել է Ֆիզիկական դաստիարակության ամբիոնի. շուրջ 1 տարվա վարչական աշխատանքների պարտականություններն իրականացվել են դոցենտ Աշոտ Հակոբյանի ղեկավարությամբ: Նրան փոխարինել է Սամվել Բարոյանը, ում հաջորդել է Ալբերտ Մովսեսյանը մինչև 2019 թվականը:
2019-ից մինչ առ այսօր ամբիոնը գլխավորում է Հարություն Թամիրյանը: Պատասխանելով կառույցի կայացման և զարգացման մասին հարցերին՝ ամբիոնի վարիչն անդրադառնում է իրականացվող աշխատանքներին և մասնագիտական գործունեությանը։ «Մեզ մոտ ուսումնամեթոդական գործընթացն իրականացվում է ժամանակակից պահանջներին համապատասխան՝ դասախոսությունների և գործնական պարապմունքների ձևով: Ունենք ակտիվ գործող է 11 խմբակ՝ բռնցքամարտի, ըմբշամարտի, վոլեյբոլի, մինի ֆուտբոլի, շախմատի, հրաձգության և այլն:
Ֆիզիկական դաստիարակության ամբիոնում կազմակերպվում են ներբուհական և միջբուհական բազմաթիվ միջոցառումներ, արշավներ»,-նշում է Հարություն Թամիրյանը՝ հավելելով, որ ինչպես ուսանողները, այնպես էլ դասախոսները մասնակցում են տարբեր միջոցառումների և առաջնությունների:
Ամբիոնի վարիչը վստահ է ՝ դասախոսը սեփական փորձով և հաջողություններով պետք է օրինակ ծառայի ապագա բժիշկներին: Հարություն Թամիրյանը ևս իր մարզչական աշխատանքի ընթացքում պատրաստել է մի շարք բարձրակարգ մարզիկների, աշխարհի և Եվրոպայի մեդալակիրների:
Ամբիոնը համալրված է մանկավարժական որակյալ և նվիրված մասնագետներով: Բուհում երկար տարիների դասախոսական աշխատանք է իրականացնում Աշոտ Հակոբյանը, Նարեկ Շիրինյանը, Անդրանիկ Վարդանյանը և այլք: Նրանք իրենց մասնագիտական ողջ ներուժը փոխանցում են բժշկական համալսարանին և ֆիզիկական դաստիարակությանը։ Այս թիմին է միացել նաև ծանրամարտի աշխարհի չեմպիոն Նազիկ Ավդալյանը:
Ֆիզիկական ակտիվությունը համարելով առողջության հիմքը և ամփոփելով խոսքը՝ սպորտի վարպետ Հարություն Թամիրյանը նշում է, որ ԵՊԲՀ ֆիզիկական դաստիարակության ամբիոնը շարունակելու է կազմակերպել տարբեր միջոցառումներ՝ ջանք չխնայելով ապահովել ապագա բժիշկների բազմաթիվ հաջողությունները նաև սպորտի ոլորտում: