«Միքայելյան» համալսարանական հիվանդանոցի գլխավոր բուժքույր, Հայաստանի բուժքույրերի ասոցիացիայի նախագահ Գեղանուշ Ստեփանյանի նախագահությամբ ԵՊԲՀ-ում` մայիսի 12-ին բուժքույրերի միջազգային օրվան ընդառաջ լեփ լեցուն դահլիճում անցկացվեց համագումար:
Մասնակցում էին քույրական գործի մասնագետներ հանրապետության տարբեր բժշկական հաստատություններից:
Հիմնական ասելիքը մեկն էր` կարևորել, ընդգծել բուժքույրերի աշխատանքը, գիտելիքի կատարելագործումը` ի նպաստ պացիենտների, բուժօգնության որակի լավացման, առողջության:
Իր ելույթում Գեղանուշ Ստեփանյանը մեջբերեց աշխարհի առաջին բուժքրոջը` Ֆլորենս Նայթինգեյլի պատմությունը, ում այսօր ժամանակակից աշխարհում համարվում են այս մասնագիտության հիմնադիրը: Նաև ներկայացրեց բուժքույրերի էթիկական կոդեքսը, որը 4 կետով սահմանում է հիմնական սկզբունքները` շեշտադրելով հավատարիմ օգնել բժշկին իր աշխատանքում և ծառայել այն մարդկանց, ովքեր իրեն վստահել են:
Ողջույնի ուղերձում Հայաստանի բուժքույրերի ասոցիացիայի նախագահը նշեց, որ բուժքույրությունն աշխարհի ամենամարդասիրական մասնագիտությունն է. «Դուք պետք է ձգտեք լինել մասնագիտորեն կրթված, գիտակ, բանիմաց բուժաշխատող` միաժամանակ օժտված լինելով վեհ անձնային բնութագրով, քանի որ կարեկցանքը կարող է թելադրել, բայց միայն գիտելիքը կհուշի` ինչ անել»:
Նա մաղթեց մասնակիցներին, որպեսզի պացիենտների ժպիտները վկայեն նրանց մասնագիտական բարձր վարպետության մասին և բավականություն պատճառեն աշխատանքում:
Համագումարի աշխատանքները մեկնարկել էին վաղ առավոտյան` հագեցած գիտական օգտակար նյութերով, երկխոսություններով:
Մասնակիցները մեծ բավականություն ստացան շաբաթօրյա այս միջոցառումից։
