Հնդիկ ապագա բժիշկ Իպշիտա Գերան hպարտ է, որ ավարտել է Երևանի Մխիթար Հերացու անվան պետական բժշկական համալսարանը։
«Ամեն օր ես սովորում էի՝ մասնակցելով, միաժամանակ, արտալսարանային միջոցառումներին: Փորձում էի ինչ-որ նոր բան սովորել, ուշադիր լսել և ակտիվորեն ներգրավվել դասերին, իսկ դասախոսներս արդյունավետորեն պատասխանում էին իմ բոլոր հարցերին», – հիշում է Իպշիտան:
Նա հավաստիացնում է, որ բախտ է ունեցել շրջապատված լինել աշխատասեր և նպատակասլաց մարդկանցով, որոնց կարող էր զանգահարել և անհրաժեշտ օգնություն ստանալ:
Արդեն շրջանավարտ Իպշիտա Գերայի խորհուրդն է ապագա բժիշկներին՝ սովորել փրկել կյանքեր։
Հնդիկ շրջանավարտ Պանկաջ Բհատին ևս շատ հպարտ է բժիշկ կոչվելու հնարավորության համար: «Իմ ճանապարհը դեպի բժշկական համալսարան հարթեց ավագ եղբայրս, որը ևս ավարտել է բուհը։ Տեսնելով նրան՝ ես հասկացա, որ դա այն է, ինչին ուզում եմ հասնել իմ կյանքում: Եվ այս 6 տարին համալսարանում ինձ ստիպեց «նվաճել» բժշկի կոչումը», – ասում է Պանկաջը։
Ապագա բժիշկը նախատեսում է շարունակել ճանապարհը՝ մասնագիտության մեջ ավելի մեծ բարձունքների հասնելու և ծնողներին ավելի հպարտ դարձնելու համար։
Բժշկական համալսարանի հնդիկ շրջանավարտներից Շարոն Սինգհը միշտ ցանկացել է բժիշկ լինել։ «Ես չգիտեի, թե ուր է տանելու այս ճանապարհը, բայց Աստված ճիշտ ժամանակին բացեց դռներն ինձ համար։ ԵՊԲՀ-ն շատ մեծ դեր խաղաց երազանքիս իրականացման գործում», – ասում է նա։
Բուհի մասին շրջանավարտն իմացել է համալսարանում արդեն սովորող ընկերների միջոցով։ «Շնորհակալ եմ բոլոր դասախոսներին և բժիշկներին իրենց կիսած գիտելիքների, մշտական աջակցության և 6 տարվա գեղեցիկ արկածի համար», – ասում է Շարոն Սինգհը։
Կրտսեր գործընկերներին նա խորհուրդ է տալիս սիրահարվել այն ամենին, ինչ սովորում են, քրտնաջան աշխատել և հավատալ սեփական ուժերին։