ԵՊԲՀ մանկական ստոմատոլոգիայի և օրթոդոնտիայի ամբիոնի վարիչ, Թիվ 2 ստոմատոլոգիական պոլիկլինիկայի ղեկավար Հրանտ Տեր-Պողոսյանն արժանացել է Պիեռ Ֆոշարի ակադեմիայի մրցանակի:
Սեպտեմբերի 15-ին Դուբլինում` Իռլանդիայի բժշկական Թագավորական քոլեջում, անցկացվել է Պիեռ Ֆոշարի ակադեմիայի մրցանակի հանձնման ամենամյա արարողությունը: Նման մրցանակ շնորհվում է աշխարհի ականավոր ստոմատոլոգներին: Ակադեմիայի կանոնադրության համաձայն՝ մրցանակակիրները բարձրագույն էթիկական, բարոյական սկզբունքներ և մասնագիտական չափանիշներ ունեցող մարդիկ են, որոնք ներկայացնում են գիտական բնագավառը, հանրօգուտ գործունեություն են ծավալում:
Ներկայացուցչական այս ցանկը գլխավորում էր մեր երկիրը ներկայացնող Հրանտ Տեր-Պողոսյանը:
«Ինձ համար մեծ պատիվ է լինել Պիեռ Ֆոշար ակադեմիայի անդամ։ Շնորհակալ եմ մեր մասնագիտության զարգացման մեջ իմ համեստ ներդրումը բարձր գնահատելու համար։ Հավատացնում եմ, որ ջանքերս կրկին ուղղված կլինեն Հայաստանի ստոմատոլոգիայի և գիտության զարգացմանը», – ընդգծեց համալսարանականը, ով վստահ է՝ մրցութային ընթացակարգով այս մրցանակին արժանանալը մասնագիտությունն առավել զարգացնելու հերթական խթանն է:
