Մասնագիտական և շարունակական կրթության կենտրոնի միկրովիրաբուժության ամբիոնի երկրորդ կուրսի կլինիկական օրդինատոր Կարեն Պողոսյանը վստահ է՝ բացի մասնագիտական խորը գիտելիքներից բժիշկը պետք է լինի նաև մարդասեր, համբերատար և ոչինչ չխնայի մարդկանց օգնելու, առողջությունը վերականգնելու համար:
ԵՊԲՀ սովորողը բժշկությունը համարում է ամենակարևոր և հետաքրքիր մասնագիտություններից, ինչը շարունակական ջանքեր և աշխատասիրություն է պահանջում, ուստի մասնագիտություն ընտրելիս կանգ է առել հենց բժշկի ուղու վրա:
Ապագա միկրովիրաբույժն աշխատում է շտապօգնության ծառայությունում: Նա ևս սպիտակ բանակի շարքը համալրելով Արցախյան վերջին պատերազմի ժամանակ կատարել է բժշկի կարևոր և պատասխանատու պարտականությունները:
«Աշխատելով շտապօգնությունում որպես բրիգադի բժիշկ պատերազմի առաջին օրվանից ներգրավված եմ եղել մեր հերոս տղաների տեղափոխման աշխատանքներում: Ամեն անգամ Երևան հասնելուն պես, ծնողների՝ իրենց որդիների սպասումը տեսնելը, ստիպում էր, որ առանց մի վայրկյան վարանելու գնամ մյուս տղաների հետևից»,-նշում է կլինիկական օրդինատորը:
Նրա խոսքով՝ պատերազմի ժամանակ բժշկի աշխատանքի լարվածությունը կրկնակի մեծանում է, քանի որ վիրավորներն առաջին հերթին հայրենիքի պաշտպաններ են:
Կարեն Պողոսյանին պատերազմը ստիպել է վերարժևորել կյանքը, ավելի շատ սիրել և գնահատել հայրենիքը. «Մենք բոլորս պարտավոր ենք ապրել և շենացնել մեր հայրենիքը»:
Կլինիկական օրդինատորը թեև ազատ ժամանակ քիչ ունի, բայց սիրում է անցկացնել ընկերների հետ, ճամփորդել և նոր բացահայտումներ անել:
Ապագա միկրովիրաբույժը պատերազմում ակտիվ մասնակցության համար արժանացել է նաև պետական պարգևի ՝ «Մխիթար Հերացի» մեդալի: