Բժիշկ դառնալու գործընթացը երկար ու պատասխանատու ճանապարհ է, որը 100-ամյա բուհի ուսանողները հաղթահարում են՝ որպես մարտահրավեր ունենալով այնպիսի փորձություններ, ինչպիսիք են համավարակն ու պատերազմը:
ԵՊԲՀ ընդհանուր բժշկության ֆակուլտետի 5-րդ կուրսի ուսանող Սարո Մանասյանը, վերահաստատելով բժիշկ դառնալու իր պատասխանատու որոշումը, նշում է՝ պատրաստվում է լրջորեն վերաբերել ընտրած մասնագիտությանը: «44-օրյա պատերազմի ժամանակ առիթ եմ ունեցել աշխատել Հիպրոկրատի երդում տված, օրուգիշեր չքնող, տարբեր աստիճանի ծանրության վիրահատություն իրականացրած, մասնագիտական պարտքը կատարող բացառիկ բժշկների հետ»,- մատնանշում է պատերազմի առաջին օրն Արցախ մեկնած ապագա բժիշկը:
Սարո Մանասյանը Ստեփանակերտի մանկական հիվանդանոցներից մեկում իրականացրել է վիրավորներին օգնություն ցույց տալու իր առաքելությունը: Հոկտեմբերի կեսերից ներգրավվել է շտապօգնության ծառայության աշխատանքներին, մասնակցել է Արցախից Երևանի բուժհիմնարկներ վիրավորների տեղափոխման գործին:
Պատերազմի ընթացքում շտապօգնության ծառայության բրիգադի կազմում ԵՊԲՀ սովորողն ունեցել է շուրջ 20 այց դեպի Արցախ և Վարդենիս:
Լինելով ծնունդով Արցախից՝ միշտ զգացել է պատերազմի վտանգը:
Բժշկական բուհի 5-րդ կուրսի ուսանողը նշում է, որ չնայած դժվարություններին՝ պատերազմի ժամանակ ներդրել է բոլոր ջանքերն իր առջև դրված խնդիրները ճիշտ լուծելու համար: «Այդ օրերին ինչպես յուրաքանչյուրի, այնպես էլ մեզ վրա մեծ պատասխանատվություն էր դրված՝ վստահված գործը պատվով կատարելու համար»,-ընդգծում է սովորողը:
Նրա խոսքով՝ վիրավոր զինվորներից շատերն իր հասկակիցներն էին կամ տարիքով իրենից փոքր: «Դա ինչ-որ չափով ազդում էր իմ ներաշխարհի վրա, սակայն, գիտակցելով իմ ընտրած մասնագիտության կարևորությունը, հասկանում էի, որ իրավունք չունեմ առաջնորդվել զգացմունքներով, ինչը ստիպում էր հաղթահարել դժվարությունները»,-ավելացնում է նա:
Խոսելով բժշկի մասնագիտության ընտրության մասին՝ նշում է, որ մանկուց իրեն հետաքրքրել է մարդու օրգան-համակարգը, գործունեությունը, մեխանիզմները:
Ապագա բժիշկն արդեն կողմնորոշվել է նաև մասնագիտացման ընտրության հարցում: Հաշվի առնելով, որ հնարավորություն է ունեցել մասնակցել տարբեր վիրահատությունների` նախանշում է ընտրել ընդհանուր վիրաբույժի ուղին: «Իմ նպատակն է դառնալ լավ մասնագետ, օգտակար լինել հայրենիքին, Արցախ աշխարհին»,- ընդգծում է նա` փաստելով, որ Արցախ վերադառնալու է՝ արդեն որպես բժիշկ:
Կարևորելով բժշկի կայացման ընթացքում գործնական հմտությունների ձեռքբերումը` այժմ իր գործունեությունը շարունակում է Երևանի շտապօգնության ծառայությունում:
Սարո Մանասյանը բժշկական համալսարանի այն ուսանողներից, որը սեպտեմբերի 27-ից մինչև նոյեմբերի 9-ը տևած ռազմական գործողությունների ընթացքում անձնվեր աշխատանքի, խիզախության, հայրենիքին նվիրված և անմնացորդ ծառայության համար պարգևատրվել է ՀՀ առողջապահության նախարարության պատվոգրով: