ԵՊԲՀ պատվիրակությունը «Էրազմուս+» ծրագրի SAFEMED+ նախագծի շրջանակում մայիսի 29-ից հունիսի 1-ը հյուրընկալվել է Լիտվայի Վիլնյուսի համալսարանում:
Համալսարանական թիմը` Միջազգային համագործակցության բաժնի պետ, SAFEMED+ նախագծի համակարգող Աննա Ղազարյանը, Կարիերայի կենտրոնի ղեկավար Խաչատուր Մարգարյանը, Ներքին հիվանդությունների պրոպեդևտիկայի ամբիոնի դասախոս Անի Ռափյանը և Վիրաբուժության թիվ 4 ամբիոնի դասախոս Արամ Միրիջանյանը հրավիրված էին Վիլնյուսի համալսարանի բժշկական ֆակուլտետի կողմից՝ որպես ծրագրի գործընկեր բուհի ներկայացուցիչներ:
Նախագծի հանդիպման ժամանակ քննարկվել են OSCE (Objective Structural Clinical Exams – Օբյեկտիվ կառուցվածքային կլինիկական քննության) ձևաչափով համակարգչային անցկացման հնարավորությունները, մեթոդները՝ Moodle էլեկտրոնային ուսուցման հարթակով, ինչպես նաև SAFEMED+ նախագծի OSCE սցենարների ձեռնարկի վերջնական խմբագրման աշխատանքները:
Հայ մասնագետներին օտարերկրացի գործընկերները ներկայացրել են հարթակը կիրառելու մանրամասները, ծանոթացրել հեռավար քննությունների համար սցենարներ պատրաստելու առանձնահատկություններին:
«Մեր բուհի կողմից ներկայացված էր երկու կլինիկական դեպք-սցենար, որոնք նույնպես հաստատվեցին, և մինչև հոկտեմբեր լույս կտեսնի OSCE սցենարներով մշակված ձեռնարկ, որի ստեղծմանը մասնակցել է նաև համալսարանը», – մանրամասնում է Անի Ռափյանը, ով նաև SAFEMED+ ծրագրի՝ ԵՊԲՀ-ի կողմից ծրագրային բարելավման հանձնաժողովի ներկայացուցիչն է:
Անդրադարձ է կատարվել նաև հենց այս շրջանում ընթացող և մայիսի 29-ին ԵՊԲՀ-ում առաջին անգամ մեկնարկած պետական ավարտական քննության գործնական հմտությունների ատեստավորմանը` SAFEMED+ նախագծի շրջանակում ծրագրային փոփոխություններին, այլ ընթացիկ հարցերի:
Այցի շրջանակում կարևորվել են նաև OSCE քննությունների՝ հաղորդակցման հմտությունների բարելավմանը վերաբերող փոփոխությունները: