ԵՊԲՀ ռազմաբժշկական ֆակուլտետ ընդունված 15 առաջին կուրսի ուսանող այսօր որպես ապագա ռազմական բժիշկ մեկնարկեց բժշկական կրթությունը:
Ռազմաբժշկական ֆակուլտետի պետ Վարդան Ծատուրյանը ողջունելով կուրսանտներին՝ ասաց, որ պատիվ և պարտականություն է բժշկական բուհի սովորող լինելը: «Լավ սովորելու պարագայում ձեզ սպասվում է մասնագիտական փայլուն ապագա»,-փաստեց ֆակուլտետի ղեկավարը՝ ուսումնական գործընթացում կարևորելով բարձր առաջադիմությունն ու կարգապահությունը:
Վարդան Ծատուրյանի խոսքով՝ ֆակուլտետի առաջնահերթություններից է ապահովել կրթական բարձր որակ՝ Հայոց բանակի համար մրցունակ ապագա ռազմական բժիշկներ կրթելու նպատակով: «Դուք այսօր մեկդարյա պատմություն ունեցող բուհի ուսանողներն եք և պետք է աչքի ընկնեք ձեր կարգապահությամբ, բարձր առաջադիմությամբ՝ օրինակ ծառայելով բոլորին»,-ասաց ֆակուլտետի պետը՝ հիշեցնելով, որ բժշկական բուհի շրջանավարտներն իրենց մասնագիտական բարձր որակներով աչքի են ընկնում ոչ միայն Հայաստանում, այլև մեր երկրի սահմաններից դուրս:
