Մայիսի 4-ին տեղի ունեցավ օպերատիվ վիրաբուժության և տեղագրական անատոմիայի ամբիոնի վիրաբուժական խմբակի ամփոփիչ օլիմպիադան։
Ձևավորվել էր 8 թիմ (6-ական մասնակիցներով)։ Յուրաքանչյուր թիմի հետ, շուրջ մեկ ամիս, տարվել էին նախապատրաստական աշխատանքներ։ Արդյունքում բոլոր թիմերը հաղթահարեցին հետևյալ փուլերը
Օլիմպիադայի ժամանակ ուսանողների աշխատանքը ստուգում և գնահատում են ոլորտի փորձված մասնագետները՝ անվանի բժիշկներ, դասախոսներ։
Ժյուրիի կազմում էին՝
Սևակ Շահբազյան՝ Երևանի գլխավոր վիրաբույժ, ԲԳԹ
Կամո Շաբոյան՝ Ռազմադաշտային վիրաբուժության ամբիոնի վարիչ, ԲԳԴ
Վարդան Ծատուրյան՝ բժշկական գիտությունների դոկտոր, բ/ծ գնդապետ
Սուրեն Հովհաննիսյան՝ ԵՊԲՀ սիմուլյացիոն կենտրոնի ղեկավար, ԲԳԴ
Նիկոլայ Դալլաքյան՝ մանկական վիրաբույժ, դոցենտ
Ժյուրիի բոլոր անդամները ողջունեցին նման նախաձեռնությունների կազմակերպումը, խմբակում և խմբակից դուրս ուսանողների` ակտիվություն ցուցաբերելը, շեշտեցին նրանց գործնական հմտությունների զարգացման կարևորությունը։ Հորդորեցին անպայման շարունակել նման միջոցառումների իրականացումը և չկորցնել ուսումնատենչությունը։
«Շնորհավորում եմ բոլորիդ։ Կարևորը մասնակցությունն է, բժիշկ դառնալու ճանապարհը սա է և սա այն ապացույցն է, որ ուսանողն իր հետաքրքրությամբ դառնում է բժիշկ։ Թող մասնագիտական ձեռքբերումները շարունակական լինեն»,- ասաց Ռազմադաշտային վիրաբուժության ամբիոնի վարիչ Կամո Շաբոյանը։
Ուսանողներին խոսք հղեց նաև Օպերատիվ վիրաբուժության և տեղագրական անատոմիայի ամբիոնի վարիչ, պրոֆեսոր Սեմյոն Օրդույանը, նշելով, որ չափազանց կարևոր է աշխարհաղաքական իրադրություններով պայմանավորված բժշկական համալսարանի ուսանողի պարզագույն վիրաբուժական և առաջին օգնության հմտություններին տիրապետելը։ Նա, նույնպես, ողջունեց խմբակի կողմից հաջող օլիմպիադայի կազմակերպումը, նրանց ակտիվությունն ու պատրաստակամությունը։
Տեղեկացնենք, որ մայիսի 11-ին, ժամը 10։00-ն Ռոբերտ Քարամյանի անվան 8-րդ լսարանում, տեղի կունենա օպերատիվ վիրաբուժության և տեղագրական անատոմիայի ամբիոնի վիրաբուժական խմբակի ամփոփիչ կոնֆերանսը, որի ընթացքում կներկայացվեն կիսամյակի լավագույն զեկույցները։
