«Բուժական գործ», «Ստոմատոլոգիա», «Ֆարմացիա» կրթական ծրագրերում փոփոխությունների հաստատման հարցով մեկնարկեց Գիտական խորհրդի հունիսի 25-ի նիստը, որը զեկուցեց Ուսումնական աշխատանքների գծով պրոռեկտոր Լարիսա Ավետիսյանը։
Գիտական խորհուրդը ուսումնական գրականության տպագրության երաշխավորություն տվեց համալսարանականների հեղինակմամբ ապագա բժիշկների, կլինիկական օրդինատորների, քոլեջի ուսանողների, հետազոտողների համար նախատեսված 5 ուսումնական ձեռնարկի և 1 դասագրքի։
ԵՊԲՀ ռեկտոր Արմեն Մուրադյանը շեշտեց, որ Գիտական խորհրդի ընթացակարգի համաձայն ուսումնական գրականությունը պետք է հաստատվի նիստում, և, հաշվի առնելով ուսումնական տարվա ընթացքում քննարկվող մեծաթիվ հարցերն ու զեկույցները, այն ներառվել է այս նիստի օրակարգում։
Ռեկտորի տեղեկացմամբ՝ հեղինակները երկար են սպասել գրականության հաստատմանը, և կոլեգաները նրանց աշխատանքների վերաբերյալ հարցեր հղելու հնարավորություն ունեն։
Հաջորդիվ նիստի առանցքում էր ԵՊԲՀ ամբիոնների վարիչների և պրոֆեսորների ընտրության հարցը։
Բուհի ղեկավարը նշեց, որ վիրաբուժական ամբիոնների վերակազմավորումը, մասնավորապես՝ մրցույթին ներկայացված ամբիոնների մի մասը, միջազգային ծրագրային հավատարմագրման պահանջ է և նպատակ ունի նոր զարկ տալ մեր երկրում վիրաբուժության զարգացմանը, վիրաբուժական դպրոցների կայացմանը։
«Վիրաբուժության բնագավառում կադրային մեծ ներուժ կա։ Վիրաբուժությունն, ինչպես հայտնի է, ենթադրում է նախաձեռնողականություն և պատասխանատվություն», – նկատեց Արմեն Մուրադյանը՝ վստահություն հայտնելով, որ յուրաքանչյուր թեկնածու զգում է այդ պատասխանատվությունը և կարդարացնի այն։
Համալսարանի Գիտական քարտուղար Տաթևիկ Ավագյանը ներկայացրեց հինգ ամբիոնի վարիչի և պրոֆեսորի՝ բուհի որակավորման և Ընդհանուր բժշկության ֆակուլտետի ուսումնագիտական խորհուրդների կողմից երաշխավորված թեկնածուների կենսագրությունն ու անցած աշխատանքային ուղին։
Արդյունքում՝ մրցութային ընթացակարգով, փակ գաղտնի քվեարկությամբ
Անդրադարձ կատարվեց բուհական գործընթացներին վերաբերող մի շարք այլ ընթացիկ հարցերի։
Ամփոփելով՝ ռեկտոր Արմեն Մուրադյանը հայտարարեց 2024-2025 ուսումնական տարվա վերջին՝ Գիտական խորհրդի հանդիսավոր նիստի անցկացման օրը։ Հուլիսի 9-ը կնշանավորվի շրջանավարտների երդման ամենամյա արարողությամբ։
