Բժիշկ Ջոն Բիլեզիկյանը բժշկության և դեղագործության պրոֆեսոր է: «Օստեոպորոզի հայկական ասոցիացիայի» և Նյու Յորքում գործող Կոլումբիայի համալսարանի մետաբոլիկ ոսկրային հիվանդությունների ծառայության ղեկավար, էնդոկրինոլոգիական բաժանմունքի վարիչն այսօր ԵՊԲՀ-ում հանդես եկավ «Օստեոպորոզ նոր մոտեցումներ» թեմայով դասախոսությամբ:
Պրոֆեսորը բազմաթիվ միջազգային բժշկական և գիտական կոմիտեների և միությունների անդամ է և հեղինակ բազում գիտական հոդվածների, որոնք նվիրված են տարատեսակ ոսկրային հիվանդությունների կլինիկական հետազոտությունների լուսաբանմանը: Նա խոսեց մեր երկրում օստեոպորոզի զարգացման հիմնական պատճառների, կանխարգելման և բուժման մասին:
Պրոֆեսորի դասախոսության առանցքում էին նաև հանրային առողջությանը վերաբերող մի շարք այլ հարցեր: Հայրենիքի հետ կապը չկորցրած մասնագետը մեծապես կարևորեց նաև կրթական, հետազոտական ծրագրերի իրականացումը: Որպես ոչ միայն օստեոպորոզի, այլև այլ հիվանդությունների դեմ արդյունավետ պայքար մղելու միջոց, դասախոսը մատնանշեց ամենամյա մասնագիտական հավաքները, որոնք հնարավորություն են տալիս քննարկել տարատեսակ հիմնախնդիրներ և մատնանշել դրանց լուծման ուղիները:
Միջոցառման ընթացքում ԵՊԲՀ գիտության գծով պրոռեկտոր Կոնստանտին Ենկոյանը հայտնեց, որ այսուհետև Ջոն Բիլեզիկյանը կհանդիսանա որպես ԵՊԲՀ այցելու պրոֆեսոր: Բժիշկ-գիտնականը հավաստիացրեց, որ Հայաստանում գտնվելու ընթացքում առիթը բաց չի թողնի այցելել նաև բժշկական համալսարան և մասնակից դառնալ ԵՊԲՀ-ում իրականացվող կրթական ակտիվություններին: Նշենք, որ շնորհիվ Ջոն Բիլեզիկյանի սրտաբուխ նվիրատվությանը «Մուրացան» համալսարանական հիվանդանոցի էնդոկրինոլոգիայի բաժանմունքը վերազինվել էր նորագույն ուլտրաձայնային դենսիտոմետրով:
Ոսկրի խտությունը չափող այս սարքը հայտնաբերում է ոսկրի միներալ խտության մեջ տեղի ունեցած փոփոխությունները և այսօր լայնածավալ կիրառություն ունի ողջ աշխարհով մեկ` օստեոպորոզի վաղ հայտնաբերման նպատակով: Տարիներ առաջ նշյալ հիվանդությունը հայտնաբերվում էր միայն ոսկրի կոտրվածքից հետո: Մինչդեռ մեր օրերում, վաղ ախտորոշման դեպքում, կարելի է ձեռնարկել համապատասխան միջոցառումներ՝ օստեոպորոզի ընթացը դանդաղեցնելու և ոսկորներն ամրացնելու ուղղությամբ: