Ռազմաբժշկական ֆակուլտետի 6-րդ կուրսի ուսանող Վարդան Հարությունյանի հետաքրքրությունը դեպի բժշկի մասնագիտությունը դեռ մանկուց սերմանել են ծնողները:
«Եղբայրս զինվորական էր: Ոգեշնչվելով եղբորիցս՝ որոշեցի համատեղել այս երկու կարևոր մասնագիտությունները և ընտրել ռազմական բժիշկի ուղին»,- նշում է ապագա ռազմական բժիշկը՝ ավելացնելով, որ մասնագիտական ճանապարհը, որում կայանում է ամբողջ բժշկական հմայքը բարդ է ու քարքարոտ, իսկ այդ ճանապարհը լուսավորելու և հարթելու մեջ մեծ դերակատարում ունի բժշկական համալսարանը։
Վարդան Հարությունյանը բարձր առաջադիմությամբ սովորել է Հուշակերտ գյուղի միջնակարգ դպրոցում, ապա ընդունվել է ԵՊԲՀ և նույն առաջադիմությամբ շարունակում է ուսումը ռազմաբժշկական ֆակուլտետում։
Ապագա ռազմական բժիշկն ունի հետաքրքրությունների լայն շրջանակ, որոնցից առանձնացնում են երկուսը՝ շախմատն ու գիտությունը: «Շախմատը ռազմավարական խաղ է՝ պահանջում է կենտրոնացում, համբերատարություն և ճիշտ թիրախներ գտնելու ունակություն: Գիտությամբ զբաղվել ցանկացող մարդուն այս հատկանիշներն անհրաժեշտ են»,-կարծում է ՌԲՖ ուսանողը:
Նա նեղ մասնագիտության ընտրության հարցում մի քանի տարբերակ ունի։
«Առաջինն ակնաբուժությունն է, քանի որ կարծում եմ՝ առանց կյանքի գույները տեսնելու դժվար է լիարժեք կյանքով ապրել։ Երկրորդը ռեանիմատոլոգիան է՝ կյանքի ու մահվան սահմանին գտնվողին փրկելու կարողությունը»,-ասում է բժշկական համալսարանի ուսանողը՝ ավելացնելով, որ հնարավորության դեպքում նեղ մասնագիտացումը ձեռք կբերի արտերկրում, որից հետո կվերադառնա հայրենիք և իր ներուժը կներդնի իր որոլորտում երկիրը զրագացնելու գործին։
ՌԲՖ ուսանողը շեշտում է, որ իր հետագա գործունեության անբաժան մասն է լինելու դասախոսելը՝ նոր սերունդներին գիտելիքներ փոխանցելը։
Անդրադառնալով ռազմական բժշիկի ուղին բռնած անհատի կարևոր հատկանիշներին՝ նշում է, որ հայրենասիրություն հետ մեկտեղ պետք է ունենալ նաև մեծ մարդասիրություն։
«Բավական դժվար է այլ մարդու կյանքն ու առողջությունը վեր դասել սեփականից։ Իսկ իրական հայ ռազմական բժիշկը պետք է օժտված լինի այդ կարողությամբ»,-ասում է նա՝ կարևորելով արագ կողնորոշվելու ունակությունն ու հոգեբանորեն կայուն լինելը։
Վարդան Հարությունյանի խոսքով՝ ընտրած ոլորտում լավագույններից մեկը լինելու ձգտումն ու ցանկությունը` գիտական նորարարություններից անմասն չմնալու, այն շարժիչ ուժն է, որն ուղղորդում է իրեն:
«Ինձ համար կատարելություն նշանակում է իմաստություն»,-ավելացնում է ապագա ռազմական բժիշկը: