«Ամեն ինչ թրոմբոզի մասին» միջազգային համաժողովը ԵՊԲՀ-ում մեկտեղեց արտերկրի և Հայաստանի ավելի քան 500 մասնագետի, որոնք երկու օր քննարկեցին թրոմբոզի ախտորոշմանը, բուժմանն ու կանխարգելմանը վերաբերող մի շարք արդիական հարցեր:
Համաժողովի երկրորդ օրվա զեկույցները թեմատիկ հագեցվածությամբ չէին զիջում: Կլինիկական զեկույցներից զատ արտերկրի մասնագետները հայ գործընկերներին ներկայացրին նաև գիտական ոլորտի իրենց փորձը:
Աբերդենի համալսարանի գլխավոր պրոռեկտոր Մայքլ Գրիվսը խոսեց գիտական հոդված գրելու առանձնահատկությունների մասին: Նա տարիներ շարունակ խմբագրել է British Journal of Haematalogy և Journal of Thrombosis and Haemostasis գիտական ամսագրերը: Իր զեկույցներում մասնագիտական բազմաթիվ հարցերի անդրադարձավ նաև Միլանի համալսարանի պրոֆեսոր Ֆլորա Պեյվանդին:
Այսօր ԵՊԲՀ ռեկտոր Արմեն Մուրադյանի հետ հանդիպման ընթացքում մասնագետներն ամփոփեցին «Ամեն ինչ թրոմբոզի մասին» համաժողովի արդյունքները՝ ընդգծելով, որ հատկապես ոգևորիչ է երիտասարդների, ուսանողների ակտիվ մասնակցությունը:
Ռեկտորը ևս կարևորեց այն հանգամանքը, որ միջազգային համաժողովը նախաձեռնել են երիտասարդ բժիշկները: Նա շեշտեց, որ ԵՊԲՀ-ում իրականացվող բազմաթիվ ծրագրերի նպատակն է հագեցնել ուսանողական կյանքը նորարարություններով: Բուհի ղեկավարը խոսեց նաև 100-ամյակը բոլորող բուհի միջազգայնացմանն ուղղված մի շարք աշխատանքների մասին:
Հանդիպման ընթացքում քննարկվեցին նաև մասնագետների վերապատրաստման, փորձի փոխանակման, համագործակցության ընդլայնման մի շարք հարցեր:
Նշենք, որ հյուրերը նախօրեին հանդիպել էին նաև Heratsi iLAB ուսանողական նախաձեռնության անդամների հետ: