Դեկտեմբերի 1-ին՝ ՁԻԱՀ-ի դեմ պայքարի համաշխարհային օրվա շրջանակում ՄԻԱՎ վարակի վերաբերյալ ինքնաթեստավորման քարոզարշավ անցկացվեց ԵՊԲՀ-ում: Հայաստանի երիտասարդական հիմնադրամը ՄԱԿ-ի ՄԻԱՎ/ՁԻԱՀ Միացյալ ծրագրի տեխնիկական աջակցությամբ իրականացնում է «Հայաստանում ՄԻԱՎ-ի վերաբերյալ թեստավորման մատչելիության ապահովում` ՄԱԿ-ի ՄԻԱՎ/ՁԻԱՀ միացյալ ծրագրի նպատակներին հասնելու ճանապարհին» ծրագիրը: Ծրագրի շրջանակներում Հայաստանի բոլոր մարզերի և Երևանի ավելի քան 30 000 երիտասարդ կրթվում է ՄԻԱՎ-ի վերաբերյալ, կարևորում ՄԻԱՎ կարգավիճակի վերաբերյալ հետազոտությունը, տեղեկանում ինքնաթեստավորման հնարավորության մասին: Այսօր ԵՊԲՀ-ում անցկացված ինքնաթեստավորման քարոզարշավին մասնակցեց 124 մարդ:
ՄԻԱՎ-ի վերաբերյալ կարգավիճակի վաղ իմացությունը կարևոր է, քանի որ ՄԻԱՎ վարակի բուժումն այսօր հասանելի է և այն ժամանակին սկսելու դեպքում հնարավոր է երկար տարիներ ապրել առողջ, լիարժեք կյանքով, ունենալ ՄԻԱՎ-ից զերծ երեխաներ, հնարավորություն է տալիս ձեռնարկելու քայլեր վարակը ուրիշներին չփոխանցելու համար: Գաղտնիք չէ, որ վարակակիրների 40 տոկոսը չգիտի իր կարգավիճակի մասին և բուժում չի ստանում: ՄԻԱՎ-ի վերաբերյալ թեստավորման մատչելիության ապահովմանն ուղղված այս նախաձեռնությունը կնպաստի, որ մեր երկրում ավելի շատ մարդիկ իմանան իրենց կարգավիճակի մասին:
ՄԻԱՎ ինքնաթեստավորումը մի գործընթաց է, որի ժամանակ անձը հավաքում է իր սեփական նմուշը (թուքը կամ արյուն) և այնուհետև իրականացնում է ՄԻԱՎ թեստավորում և մեկնաբանում է արդյունքը, հաճախ գաղտնի պայմաններում, միայնակ, կամ այն անձի հետ, ում վստահում է (Աղբյուրը` ԱՀԿ 2015) :
Ինքնաթեստավորումը հնարավորություն է տալիս արագ տեմպերով հայտնաբերել բնակչության շրջանում ՄԻԱՎ-ով ապրող մարդկանց։ Նշենք, որ ինքնաթեստավորման դրական արդյունքի դեպքում ախտորոշումը հաստատվի ՁԻԱՀ-ի կանխարգելման հանրապետական կենտրոնում։
Նշենք, որ բուժաշխատողների կողմից ՄԻԱՎ-ի վերաբերյալ թեստավորման իրականացման խոչընդոտներից հաճախ նշվում է գաղտնիության չպահպանման հնարավորությունը, հատկապես գյուղական վայրերում, որտեղ բուժաշխատողները ճանաչում են սպասարկվող բնակչությանը: ՄԻԱՎ-ի վերաբերյալ հետազոտման արագ թեստերը (այդ թվում նաև ինքնաթեստավորման համար նախատեսվածները) հանդիսանում են ՄԻԱՎ-ի ախտորոշման հասանելի և բավական ճշգրիտ, ինչպես նաև գաղտնիությունն ապահովող միջոցներ:
