ԵՊԲՀ բժշկական մանրէաբանության ամբիոնում Erasmus+ ծրագրի շրջանակում կայացավ Իսպանիայի Սանտյագո դե Կոմպոստելայի համալսարանի մանրէաբանության և մակաբուծաբանության ամբիոնի դոցենտ, PhD Տրինիդադ դե Միգելի դասախոսությունը «Հակամանրէային նոր աղբյուրների որոնում հակաբիոտիկակայունության խնդիրը մեղմելու համար» թեմայով:
Տրինիդադ դե Միգելը Սանտյագո դե Կոմպոստելայի համալսարանի Դեղագիտության և բժշկության ֆակուլտետի ընդհանուր մանրէաբանություն և կլինիկական մանրէաբանություն առարկաների պատասխանատուն է, նաև դասավանդում է սննդի մանրէաբանություն մագիստրատուրայում:
Բազմաթիվ գիտական հոդվածների և արտոնագրերի հեղինակ է: 2017 թվականից ներգրավված է «Փոքրիկ Երկիր» (իսպաներեն՝ MicroMundo) անվանումով միջազգային ուսումնական ծառայությունների նախագծում, որին մասնակցում են ուսանողներ, գիտնականներ և ուսուցիչներ ամբողջ աշխարհից։
Դեղագիտության դոկտորը համալսարանականներին` ապագա բժիշկներին և դասախոսներին ներկայացրեց Սանտյագո դե Կոմպոստելայի համալսարանը, որը հիմնադրվել է 1495 թվականին և ունի հարուստ պատմություն ու ակադեմիական ավանդույթներ։
Չնայած համալսարանի ոչ մեծ չափերին, այն համարվում է Իսպանիայի առաջատար համալսարաններից մեկը։ Նշվեց, որ միջազգային ուսանողների համար բաց են բազմաթիվ հնարավորություններ՝ մագիստրոսական, դոկտորական ծրագրերի և «Erasmus» փոխանակման միջոցով, հատկապես Հայաստանի ուսանողների համար նախատեսված կրթաթոշակները հաճախ մնում են չօգտագործված։
Հրավիրյալ դասախոսը խոսեց նաև իր գիտական խմբի կատարած աշխատանքների մասին՝ ներկայացնելով մի փորձագիտական նախագիծ, որտեղ ուսումնասիրում են խաղողի և հատուկ բույսերի (օրինակ՝ Cephysoscoparis) պոլիֆենոլները՝ որպես բնական հակաբիոտիկներ։
Դրանք կարող են ոչնչացնել վնասակար բակտերիաները՝ միաժամանակ պաշտպանելով օգտակար միկրոֆլորան, ինչը կարևոր է մարդու իմունային համակարգի համար։
Ներկայացվեցին նաև հետազոտության արդյունքները։
Վերջում Տրինիդադ դե Միգելն ընդգծեց ուսման, հետազոտական նախագծերում ներգրավվելու և Սանտյագոյում ապրելու հնարավորությունները՝ խրախուսելով ուսանողներին օգտվել «Erasmus» ծրագրից և կապ հաստատել համագործակցության համար։
