«Հերացի» իննովացիոն լաբորատորիայի (Heratsi iLAB) «Հաջողության դպրոց» խորագրով ուսանողական նախաձեռնության հերթական հյուրը ԵՊԲՀ շրջանավարտ Գարրի Ասլանյանն էր։
Մասնագետը Օտտավայի, Տորոնտոյի և Բրիտանական Կոլումբիայի համալսարանների պրոֆեսոր է, Միավորված ազգերի կազմակերպության հատուկ ամսագրի գլխավոր խմբագիր, Առողջապահության համաշխարհային կազմակերպության տրոպիկական հիվանդությունների հետազոտման հատուկ ծրագրերի համագործակցության և կառավարման հարցերով ղեկավարը: Գարրի Ասլանյանը հանդիպման մասնակիցներին ներկայացրեց իր անցած ուղին:
Հանգամանալից խոսեց այն կազմակերպությունների մասին, որտեղ տարբեր տարիներին աշխատել է, ձեռք բերել մասնագիտական հմտություններ:
Խոստովանեց, որ երբևէ չի պատկերացրել, որ իր աշխատանքն առնչություն է ունենալու հանրային առողջապահական ծրագրերի հետ: Գարրի Ասլանյանի գնահատմամբ՝ վերջին տասնամյակում գլոբալ փոփոխություններ են տեղի ունեցել նաև հանրային առողջության ոլորտում: Ներկայացնելով նաև իր կողմից իրականացրած ծրագրերը ընդգծեց, որ չի սահմանափակվում միայն մեկ զբաղվածությամբ, այլև ներգրաված է տարբեր նախաձեռնություններում:
Հեղինակավոր համալսարանների պրոֆեսորը նշեց, որ մշտապես պահպանելով կապն այս բուհերի հետ, աջակցում է հետազոտական ծրագրերի իրականացմանը, ինչպես նաև սովորողներին տրամադրում անհրաժեշտ մասնագիտական խորհրդատվություն, այլ կերպ ասած՝ ուղղորդում է նրանց այս կամ այն հետազոտական աշխատանքն իրականացնել:
Պրոֆեսորը մեծապես կարևորեց լեզուների իմացությունը, որը բոլորովին նոր դռներ ու հնարավորություններ կարող է բացել ոչ միայն առողջապահության, այլև յուրաքանչյուր ոլորտի մասնագետի առաջ: Նա նաև իր հետ բերել էր Միավորված ազգերի կազմակերպության հատուկ ամսագրի մի քանի օրինակներ: Հյուրը պատմեց, որ ամսագրերի հերթական համարներից մեկում տեղ էր գտել նաև տեղեկատվություն Շվեյցարիայում Հայաստանի դեսպան Շառլ Ազնավուրի և իր աշխատանքային հանդիպման մասին:
ԵՊԲՀ-ի, ինչպես նաև այլ բուհերի սովորողները հանդիպման երկրորդ հատվածում իրենց հարցերն ուղղեցին «Հաջողության դպրոց»-ի հյուրին: