Բժշկական համալսարանում գեղեցիկ ավանդույթ է ձևավորվել․ յուրաքանչյուր հարմար առիթի դեպքում շրջանավարտներն այցելում են մայր բուհ, հանդիպում կրթության պատասխանատուների հետ, վերհիշում կյանքի շրջադարձային և պատասխանատու շրջափուլերը։
28-ամյա Ռոհիթ Շարան Սանկարանն առաջադիմությամբ, ակտիվությամբ և պատրաստակամությամբ աչքի ընկած հնդիկ շրջանավարտներից է։
Երևանի Մխիթար Հերացու անվան պետական բժշկական համալսարանն ավարտել է 2020 թվականին, մեր երկրից մեկնել 2021 թվականին։ Ավարտել է նաև Հայաստանի Ամերիկյան համալսարանը՝ մասնագիտանալով հանրային առողջության ոլորտում։ Առաջին իսկ փորձից հաջողությամբ հանձնել է Օտարերկրյա բժշկական ավարտական քննությունը՝ FMGE (Foreign Medical Graduation Examination), և սկսել աշխատել Հնդկաստանում։
Ռոհիթ Շարանը վերջերս է ամուսնացել։ Կինը՝ 24-ամյա Սվետա Ռոհիտը, նույնպես բժիշկ է։ Առաջին վայրը, որ ամուսինները որոշեցին այցելել միասին, հենց Հայաստանն էր։ Երեք օրվա ընթացքում հասցնելով հիանալ մեր երկրի հիմնական տեսարժան վայրերով և ազգային ճաշատեսակներով՝ նրանք արդեն պլանավորում են վերադառնալ հաջորդ տարվա ամռանը՝ նորովի բացահայտելու Հայաստանը։ «Մենք կվերադառնանք նորից ու նորից․ այստեղ խաղաղ է, մարդիկ ընկերասեր են», – վստահեցնում է Ռոհիթ Շարանը։
Այժմ նա բժշկական կրթության վերաբերյալ հեռակա հետազոտություն է կատարում Շոտլանդիայի և Մալայզիայի համալսարանների հետ համագործակցությամբ:
Հետազոտության ավարտից հետո նա պլանավորում է վերադառնալ Հայաստան՝ ԵՊԲՀ-ի հետ համագործակցությամբ նոր հետազոտություն սկսելու։
Ի դեպ, Ռոհիթ Շարանն ընտանիքում միակը չէ, որ կրթություն է ստացել ԵՊԲՀ-ում․ եղբայրը՝ 25-ամյա Վարուն Ռոշան Սանկարանը, նույնպես բժշկական բուհի շրջանավարտ է։
