Ավստրիայի Վիեննա քաղաքում փետրվարին կայացել է Բժշկական Սեքսոլոգիայի Եվրոպական Միության (ESSM) 26-րդ համագումարը, որը սեռական բժշկության ոլորտում այսօր առաջատար իրադարձություններից մեկն է:
Համագումարին Հայաստանը ներկայացրել են ԵՊԲՀ սեքսոլոգիայի ամբիոնի, սեքսոպաթոլոգիայի համալսարանական կլինիկայի, Սեքսոլոգների Հայկական Ասոցիացիայի սեքսոլոգները՝ պրոֆեսոր Արամ Հակոբյանը, բ.գ.թ. Ռուզաննա Ազատյանն ու Սաթենիկ Սահակյանը։
Գիտաժողովի ընթացքում թիմը ներկայացրել է ԵՊԲՀ սեքսոլոգիայի ամբիոնի կողմից կատարված աշխատանքի համառոտագիրը՝ «Սեռական խանգարումները՝ պայմանավորված սեռական դաստիարակության տիպերով»։
ESSM-ը, որը համախմբում է աշխարհի տարբեր երկրներից սեռական բժշկության մեջ ներգրավված գիտնականների և բժիշկների, նպատակ ունի նպաստել մուլտիդիսցիպլինարային տեսլականի ձևավորմանն ու հատուկ ուշադրություն դարձնել կանանց և տղամարդկանց սեռական առողջությանը։
Այս տարվա համագումարին ժամանանել էր ավելի քան 650 մասնակից աշխարհի տարբեր երկրներից։ Հագեցած գիտական ծրագիրը մասնակիցներին ծանոթացրեց գիտության վերջին հետազոտության արդյունքներին և նորություններին:
Համագումարը մուլտիդիսցիպլինարային էր՝ համախմբել էր սեքսոլոգներին, ուրոլոգներին, գինեկոլոգներին, օնկոսեքսոլոգներին, հոգեբաններին, հոգեբուժներին։ Միջազգային մակարդակի ճանաչում ունեցող ոլորտի առաջատար մասնագետներն ու գիտնականները կիսվեցին իրենց գիտական աշխատանքներով, հետազոտություններով և փորձով։
