Երևանի պետական բժշկական համալսարանի հայոց լեզվի և բժշկական տերմինաբանության ամբիոնն արդեն երկար տարիներ կարևոր առաքելություն է կատարում՝ ուսանողների մեջ սերմանելով հայրենասիրություն և ազգասիրություն։
Ամբիոնը կարևոր դեր ունի բժշկական լեզվի կանոնարկման, մշակման, դասավանդման աշխատանքներում: Ամբիոնի մասնագետները կրթել և շարունակում են կրթել ինչպես հայ, այնպես էլ օտարերկրացի ուսանողներին։
Վերջերս ամբիոնը համալրվել է նոր բանիմաց մասնագետներով, ովքեր մեծ պատասխանատվությամբ և սիրով են կատարում իրենց աշխատանքը։ Ամբիոնականների նպատակն է տեղայնացնել դպրոցում ձեռք բերված հանրակրթական լեզվական գիտելիքները, խորացնել հայոց լեզվի իմացությունը, զարգացնել նրանց բանավոր խոսքի մշակույթը, որպեսզի կարողանան ճիշտ հայերենով շարադրել իրենց մտքերը, տիրապետեն խոսակցական լեզվին, զրույցներ վարեն առօրյա թեմաներով:
«Հայրենիքը նախ և առաջ, լեզուն է»,-այս կարգախոսով են առաջնորդվում հայոց լեզվի ամբիոնի դասախոսները։ Ամբիոնի աշխատակիցները տարիներ շարունակ զեկուցումներով կամ թեզերով մասնակցել են հանրապետությունում և համալսարանում կազմակերպված միջազգային գիտաժողովներին և գիտական նստաշրջաններին:
Նրանց դասերի և ջերմ մթնոլորտի շնորհիվ է, որ այս հյուրընկալ ամբիոնի պատերի ներսում զգացվում է ազգային, հայկական շունչը։
ԵՊԲՀ հայոց լեզվի ամբիոնի վարիչ Հենրիետա Սուքիասյանը նշում է, որ ամբիոնը տարիներ ի վեր ավանդույթ է դարձել բազմաբնույթ միջոցառումներ կազմակերպելը: Ուշադրության են արժանի, օրինակ, գրերի գյուտի 1600-ամյակին նվիրված միջոցառումը Արցախում (Գանձասար, Շուշի, Ամարաս), «Հ. Սահյան-90», «Բարեկամության կամուրջներ», Մայրենի լեզվի օրվան, Մայիսյան հաղթարշավներին, Մեծ եղեռնի տարելիցին, «Անուշ» պոեմի 100-ամյակին նվիրված միջոցառումները, ինչպես նաև ԵՊԲՀ-ի և Երևանի թատրոնի և կինոյի ինստիտուտի համատեղ ջանքերով կազմակերպված «Թումանյան-150» միջոցառումը։ Ամբիոնի ներսում գործող երգչախումբը, Հենրիետա Սուքիասյանի ղեկավարությամբ, Հանրային հեռուստաընկերության «Երգ-երգոց» հաղորդմանը լավագույն համարներով ևս հանդես է եկել։
Ամբիոնի կազմում գործող գիտամշակութային կենտրոնի գործունեության շրջանակում կազմակերպվում են նաև ուսանողական միջամբիոնական գիտաժողովներ, տեղացի և արտասահմանցի ուսանողների միջխմբային և ներխմբային բանավոր խոսքի, հայրենագիտական թեմայով մրցույթներ:
Հենրիետա Սուքիասյանի խոսքով՝ այս ամենը ստեղծագործական աշխատանքների միայն մի մասն է. «Ամբիոնում կշարունակվեն կազմակերպվել բազմաթիվ միջոցառումներ՝ այդպիսով հարստացնելով համալսարանական առօրյան»:
