ՀԱՐՑ – Ի՞նչ է պրոկրաստինացիան:
ՊԱՏԱՍԽԱՆ – Պրոկրաստինացիան կարևոր և անհրաժեշտ առաջադրանքները հետաձգելու հակումն է, որն առաջացնում է սթրես և բացասական հետևանքներ: Կարևոր աշխատանքով զբաղվելու փոխարեն մարդը պակաս կարևոր, բայց ավելի հաճելի կամ պարզ զբաղմունքներով է հագեցնում իր ժամանակը, հիմնականում՝ սոցցանցեր և այլն:
Հաճախ պրոկրաստինացիան կապված է հետևյալ խնդիրների հետ`
- Վախ բարդ խնդրի լուծման հարցում,
- Պերֆեկցիոնիզմ /ամեն ինչ իդեալական անելու ցանկություն/,
- Մոտիվացիայի կամ հետաքրքրության բացակայություն,
- Սթրես և հոգնածություն:
Ինչպե՞ս լուծել խնդիրը։
- Բաժանեք անելիքը փոքր քայլերի, այսպես ուղեղին ավելի հասկանալի է անելիքը, և ավելի շոշափելի են ձեռքբերումները:
- Անելիքներին տվեք ժամանակ` ընտրեք որոշակի ժամանակ կոնկրետ անելիքի համար, օրինակ` «Ես դրանով կզբաղվեմ 17:00-ին և կծախսեմ այդ նպատակի համար 15 րոպե»: Օգտագործեք թայմեր, որպեսզի սահմանափակեք ժամանակը, սա ստեղծում է կառուցվածքի զգացողություն և նվազեցնում է տագնապը:
- Սկսեք 2 րոպեից: Ինքներդ Ձեզ ասեք «ես կծախսեմ դրա վրա 2 րոպե», սովորաբար սկսելով՝ Դուք ծախսում եք ավելի երկար ժամանակ, քան պլանավորել էիք:
- Պարգևատրեք ինքներդ Ձեզ: Խոստացեք ինքներդ Ձեզ փոքրիկ պարգևատրում կատարված աշխատանքի դիմաց, օրինակ` ավարտելուց հետո ես կնայեմ իմ սիրած սերիալը, ինչ-որ համեղ բան կճաշակեմ կամ կզբոսնեմ:
- Կառավարեք տագնապը։
Եթե տագնապը խանգարում է աշխատել, ապա մինչև սկսելը փորձեք կատարել մի քանի խորը շունչ և արտաշունչ կամ որևէ թեթև ֆիզիկական վարժություն:
- Մի սպասեք «իդեալական պահի»: Իդեալական պահը հազվադեպ է լինում, սկսեք նրանից, ինչ կարելի է անել հենց հիմա, առանց հետաձգելու, անգամ եթե ամեն ինչ իդեալական չէ:
Կիրառեք նշված հնարքներից մեկը կամ մի քանիսը հատկապես քննաշրջանից առաջ, երբ Ամանորի տոները չեն նպաստում քննություններին նախապատրաստվելուն, և կիսվեք Ձեր ընկերների հետ հաջողություններով:
