Միֆ 1-ին՝ եթե ես հակաբիոտիկներ եմ ընդունում կամ օգտագործում եմ ինհալյատոր, ես չեմ կարող գրիպի պատվաստանյութ ստանալ:
ԻՐԱԿԱՆՈՒԹՅՈՒՆ. Հակաբիոտիկների ընդունումը կամ ստերոիդներով ինհայլատորի օգտագործումը գրիպի պատվաստումը բաց թողնելու պատճառ չեն, եթե չեք ջերմում:
Միֆ 2-րդ`գրիպի պատվաստանյութը գրիպ է առաջացնում:
ԻՐԱԿԱՆՈՒԹՅՈՒՆ. Պատվաստանյութերն օգնում են օրգանիզմին ունենալ անընկալություն՝ առանց վարակելու:
Միֆ 3-րդ` ավելի լավ է հիվանդանալ, քան պատվաստվել:
ԻՐԱԿԱՆՈՒԹՅՈՒՆ. Գրիպը լուրջ հիվանդություն է, հատկապես որոշակի ռիսկային խմբերի համար (հղիներ, երեխաներ, տարեցներ կամ քրոնիկ հիվանդություններ ունեցող մարդիկ): Պատվաստումը գրիպից պաշտպանվելու ամենաանվտանգ միջոցն է:
Կարևոր է ամեն տարի պատվաստվել, քանի որ վիրուսը փոխվում է:
Միֆ 4-րդ` գրիպը պարզապես ուժեղ մրսածություն է:
ԻՐԱԿԱՆՈՒԹՅՈՒՆ. Գրիպի և մրսածության միջև մեծ տարբերություններ կան։ Գրիպը վարակիչ վիրուսային հիվանդություն է և ախտանշանները հայտնվում են հանկարծակի, ներառյալ` ջերմություն, մկանացավեր և հոդացավեր, դող, գլխացավ, հազ և կոկորդի ցավ: Գրիպը կարող է հանգեցնել թոքաբորբի, բրոնխիտի և այլ բարդությունների: Մրսածությունն ավելի թեթև է ընթանում, ուղեկցվում է ոչ բարձր ջերմությամբ և թույլ արտահայտված ախտանիշներով:
Միֆ 5-րդ՝ վիտամին C-ն կանխում է գրիպը:
ԻՐԱԿԱՆՈՒԹՅՈՒՆ.Վիտամիններով և հանքանյութերով հարուստ առողջ սնունդը կօգնի ձեզ առողջ մնալ, բայց դա չի երաշխավորում անընկալունակություն գրիպի դեմ:
Միֆ 6-րդ` առանց տաք հագուստի դրսում գտնվելը կարող է գրիպի պատճառ դառնալ:
ԻՐԱԿԱՆՈՒԹՅՈՒՆ. Սեզոնային գրիպը համընկնում է տարվա ցուրտ եղանակի հետ, այդ իսկ պատճառով մարդիկ ցածր ջերմաստիճանը և սառը եղանակը կապում են գրիպի հետ: Մրսածությունը կարող է ազդել օրգանիզմի պաշտպանական մեխանիզմների վրա, բայց դա գրիպ չի հարուցի:
Միֆ 7-րդ՝ հակաբիոտիկները բուժում են գրիպը:
ԻՐԱԿԱՆՈՒԹՅՈՒՆ. Հակաբիոտիկները նշանակվում են բակտերիալ վարակների դեմ պայքարելու համար, մինչդեռ գրիպը պայմանավորված է վիրուսով: Գրիպի դեմ հակաբիոտիկներ ընդունելը չի բուժի վարակը և չի դադարեցնի վիրուսի փոխանցումը: Իրականում, եթե հակաբիոտիկները ճիշտ չեն օգտագործվում, դրանք կարող են վնասակար ռեակցիաներ առաջացնել և նպաստել հակամանրէային կայունության զարգացմանը:
Միֆ 8-րդ`եթե քթահոսություն ունեմ, չեմ կարող գրիպի պատվաստանյութ ստանալ:
ԻՐԱԿԱՆՈՒԹՅՈՒՆ. Դուք կարող եք պատվաստվել, նույնիսկ եթե ունեք թեթև ախտանիշներ:
Միֆ 9-րդ` գրիպը լուրջ հիվանդություն չէ, ուստի հարկավոր չէ պատվաստվել:
ԻՐԱԿԱՆՈՒԹՅՈՒՆ.Աշխարհում ամեն տարի գրիպից մահանում է մինչև 650.000 մարդ: Չնայած յուրաքանչյուրը կարող է վարակվել դրանով, բայց ծանր բարդությունների ռիսկն ավելի մեծ է թույլ իմուն համակարգ ունեցող մարդկանց մոտ: Մարդկանց մեծ մասը վերականգնվում է մի քանի շաբաթվա ընթացքում, բայց որոշ մարդկանց մոտ այնպիսի բարդություններ կարող են առաջանալ, ինչպիսիք են սինուսային վարակները, ականջաբորբը, թոքաբորբը և այլն:
Միֆ 10-րդ` եթե ես հղի եմ կամ կրծքով կերակրում եմ, չեմ կարող գրիպի պատվաստանյութ ստանալ:
ԻՐԱԿԱՆՈՒԹՅՈՒՆ. Հղիությունը կամ կրծքով կերակրումը գրիպի դեմ պատվաստումից հրաժարվելու պատճառ չեն: Հղի կանայք պետք է պատվաստվեն հղիության ցանկացած փուլում, որպեսզի պաշտպանեն իրենց և իրենց երեխաներին` կյանքի առաջին ամիսներին: Եթե հղիության ընթացքում կինը չի պատվաստվել, նա պետք է գրիպի պատվաստանյութ ստանա ծննդաբերությունից հետո:
Միֆ 11-րդ` Առողջապահության ոլորտի մասնագետները գրիպի դեմ պատվաստումներ ստանալու անհրաժեշտություն չունեն, քանի որ նրանք մշտապես շփվելով հիվանդների հետ ձեռք են բերում բնական անընկալություն:
ԻՐԱԿԱՆՈՒԹՅՈՒՆ. Առողջապահության ոլորտի մասնագետները պետք է արջնահերթ ամեն տարի պատվաստվեն՝ իրենց պացիենտներին, ընտանիքներին և իրենց պաշտպանելու համար: